Nursia Mânggo ung ka Bä ciah Benedict ah ghinlu a mong
Bä ciah Benedict k’kyak lam ah om ciah gui ah pak’khui k’chang gui Yahteih a ng’vai pi ah kya ciah ne Christu kum 480 ung Italy ghunkhaw Norcia Mânggo ung ng’tüi ciah kya ci. A ni ah be hta cu Scolastica February 10 ah kya ci. Benedict cu Roma Mânggo ung leng ne ca ng’thei man ciah kya ci. om k’ih dîdam ne kya ciah a ni ah pok’chang gui ah ghinlu cu teng ne cäicat lo ciah kya hleih a khokum m’ku ung Subiaco m’htung ah hteit ne om ciah kya ci. Kho k’hngüp ä tung a caä ng’kot ng’gèi ne om man ci goi ah a kya ah kyom hta ciah k’hngumi hta a ni ah m’lung k’nga ung ng’dang lo ne a ni ah m’lung ung shihla lam ah a ng’hlah vai ah toktap ciah kya ci. Benedict no a ten ah a kyä ung a hlui ah hluihlat gui hlut ne a ni ah a hla gui hteek ciah chüt awng ng’hling gui ah k’khan ah ng’ le ghüi ghüi ne a mät no a mät phep ciah kya ci. A cun ah a ni ah m’mü m’cha ah k’khei gui cu a kyä ah k’hma leim gui awn maih khai ah ci ciah kya ci. A ni cu Christu kum 529 ung Montecassino ung a ng’ming thang ciah Yahteih ng’htoi a m’düih ah kya ci.
A ng’ming a k’she ah thang ciah Yahteih kyawng ung a ng’vai ah kya ne a khong mang vai ah chü u hleih a cun ung hteit ne läklam gui awn a khong mang m’thei m’thang gui cu käi u ne a ni no a ok nak vai capit tüi ung a sik shum ne a mi ngon vai ah k’tha na ci gui. Cun tu pang ah phih k’chang ni cu Khanpuhi no k’pyhon ciah kya ne a ni no A pa a Hta a pyein yah ung capit bäät ng’kyak ne payak yop ciah kya ci. A im hngeit ah om ciah Taigü Boi tumat mat no phih Benedict cu vaamneng na ne a ei nak ah m’htut ung a sik a shum ba hlü phih kä aungtang ciah kya hleih a k’hngu ah Yahteih gui am kä ni ciah k’hngumi gui a täng ah a ni m’om hlak ne a ci vai ah pong ba ciah kya ci. A cun toktap nak gui a shong vai ah phäh ah Christu kum 530 ung Cassino m’htung ah Yahteih kyawng a k’thai co ne om ciah kya ci. A cun ung k’taigü nak lah bi bi ci.
ah law awn a k’hngüp täi hleih nayi 8 k’taigü ne nayi 8 ih ci cu läk ci gui ah kya ci.Bä ciah Benedict cu Christu kum 547 ung shih ciah kya ci. Bä ciah Benedict no a m’düih ah Benedict ng’htoi ung ka Papa Shangpughang 50, Taigü Mâng 7000, Bä ciah k’chàng gui 40000 om püi ciah kya ci.
