Kchò gui ah hluhngün om mòòng
Kchò pùghí pá gui ah ami pyéinnak ung Kchò gui cuh Mongo ung ka no kyum lo ci.Hlíp täng ah ka no lo neh tayuk khò hlùn neh kyum lo ci läí ah ngshíng ci.Ami pùmá ng’äî ung Páihtalì khaih thàm neh ng’äì ci gui.Ami mät no ami mät kä shüm ba u neh Yunan ung om ca Tali Manggò lah tûikbüm khmih ci gui.Ami pùghí pá ah Kchò mgòng ung Myanmar khngì kyák dò khò uk man ci vai hlü ah ng’äì ci gui.Ngshíng ci läi cuh Kchò gui cuh Tayuk-Tibet pakkhúi ung ka no kyum lo ci.Tuhchü Myanmar Ghunkhò Ngcut ci nak ung khòkum phyâ kkhak om lo ci gui.Htum ung ka noh hlíp ah ami kyum lo cuh kä täng ca tûi nghngók vai hlü ah kum phyâ gui nglak na hleih kyum lo ci gui.Ami van cuh nglêimdek ni ca Chindwin lah Ayawady mdek dó gui ung om lo ci gui.Akhngú ah Mvá noh ktäm gui hleih khòmhûng gui ah dóng neh ngthup ci gui.Cung phih Ayawady a hlíp lam täng ah amshah kdäih neh om ba ci.Ngami läí cuh Mvá on täng neh Mvá vai hlü ah om lo ci gui.Mi hnguh an ‘Dó'(တောင်သား) ci gui cuh Thìlìn kkhân täng ah om u neh kpoih ci gui cuh Yò khòdó ung om tu ci gui.Ngami cuh Kchò ah ngpài gui ah kya neh mhtûng kkâ ong ngtang hleih bilo neh om ci gui.Kchò khò ah Ingkalik kä gok lo pha ung kum1885 ung chüt hleih Kchò gui ah om mòòng shûilêi nak vai kä hnguh ah kya ci.Khngìlòng ung cêitî k’yô htá lah lung palap ami khmoh cuh paletwa lah mvá gui Kchòkhò ah ami ngpòngnak mdáng ci vai hlü ah kya ci.Cun cuh Mvá Shangpùghang ah khém shangpùghang Yò ung ami om hlak ah kya ci.Kchò gui no cun ah pìgò cuh mang im kä cung ùknak ah ngdü hngün ah hlui ci gui.Khngìlòng ktû gui cuh Mvágüng dó ung kkhòi kchap lah múi phì on hlak ah ami phìhlak gui ngdô ngpé ci gui.Cun ah ami ngpòng ng’òp cuh Mvá no Kchò kä uk màn ci cuh mdáng ci.Khòmhtûng k’om Kchò gui cuh a i yah ung phih Mvá shangpùghang ah kkâ ah kä om man ci gui.Mvá gui cuh khòmhtûng ah ami kâi ung ami nghlah ba vai lam kä om ci.Tûi k’ló noh hteh gui hnging ci.Kchò gui cuh tumat hti bo kyai,ngguî ne bo kyai ami mgúk vai,pìgò púm ami luhshí vai hteit u neh a khngät kchàng pha ci gui.Khoh kyäng neh ami lák ba vai phäh ah kya ci.Hlèi mná lah htàng mguh la ci gui.Dukkdêi na neh ngón ci gui.Cun ah ami ci cuh lung ktùng ami nglínnak ung ngmèn gui no mdáng ci gui.Ami yùmmnài ah mghûngthâ nak vai ah mgu ci gui.Gòpàinak lah khmat mcâinak gah lo shàn ci gui.Ékgâi,kkhêilèi, mkhuh nak phih gah hti ci gui.Akhláng ah om ca mkàng gui cuh natnak kä gok hleih ahêi Kchò gui ah tah gáighang tu bà ci gui.Aktúng pí ah Ngmèng gui cuh kpong ngmang gu neh hlèigô ci gui.Khngûmi gui no ami hmâi ung ngmang guk ci gui.Ami mcâ ung khngih ah apàng cuh Mvákhò tûikyùm yung ah ami om màn mdáng nak lah tûilì kchàng ah ami kya nak mdángnak ah pyêin ci gui. Akùlúm ah guk ah ngmang cuh khò khngì bói(နေနတ်သား)lah tûi kphyù(နဂါးမင်းသမီး)ah nghtá ngshòn mdáng nak ah phih pyéin ci gui.Cun cuh RC yùm lo tu láng pang u neh phih Kurusu on mtói neh mdáng ba ci gui.
