M’shi nak Sacramentu lah a k’hmo kyon nak

Caa k’cho gui noh a k’hmo ami kyon yah ung a k’hmo m’shi ci neh vah pyein man ci gui. A cun a a k’hmo ami m’shi yah ung a ng’ming thang ci phih kyai, khoh tang shäm ci phih kyai, hnguh hmat k’chang a phih kyai tumat ku ku ah a ng’ming thung neh m’shi nak bi ci gui. A cun a ami bi lo ung hngumi hta a kya ung bahkhawp hta bi pek ci gui. K’pami hta a kya ung li k’kha hta pyang neh bi ci gui ah kya ci. Ami hnga khoi cuh ng’ai on hluk neh ng’pyüm on vüt ci gui ah kya ci.

Bawi Jesu yum neh m’shi nak mi gah lo tu ci ah mik mi k’cho gui cuh mi thung man gui on ng’gui hleih mi bi lo ca kya ci. M’shi nak Sacrament mi gah lo ung bä ca k’chang gui ah ng’ming mi ng’hlui neh mi la ba ci. A k’ni a k’bä gui ah k’chang gui mi lak ba ci. Cun kon nah Bawiphaya noh m’shi nak a peit lo ung a k’hmo hta ah m’gong lah hngakawi cuh kurusu dawk pek ci. Bawi Jesu ah ng’thu k’ni a ng’ngaih tu thei vai a k’hnga tawk peit lah a m’gong cuh Bawi Jesu cuh Bawi ci neh a pyein tu hnging vai ah k’hmon peit tah kya ci. Cun a bi loh gui cuh caa k’cho thung ung mi om yah ung mi bi on a na ät lo ba ci ah kya ci.

Mikmi phih yum nak lah thung man gui ng’gui khai ah mi hmat nak on mi thung yo mi m’htei vai mi k’tha nak ko. Nami bä ni.