Bä ciah Pauline ah ghînlu a mòng
Bä ciah Pauline cu Christu kum 1865 ung Italy ghunkhaw, Trent Mânggo ah pei ah om ciah piggo hta tumat ung ng’tüi ciah kya ci. A nu lah a pa no a ni am Amabile Wisenteiner ci ne a ng’ming a mi hlui ah kya ci. A khòkúm gha yah ung a nu lah a pa no Brazil ah a ni khah püi ah kya ci. A cun om ciah Jesuit ng’htoi gui no a kho hei ah ka ng’plon lo ciah ngami ah k’kyawng khui cu a k’ni ah do ne Pauline ah m’mü m’cha lam ah nibä nak vai ah gunghtot tu ci gui ah kya ci. Pauline cu a khokum ghalei k’hma lo ciah k’hngûmi hta tumat Cancer awn yaica ne shih lo hlühleih Brazil ghûnkhaw, Vigolo Mânggo ung om ciah im tumat ung ng’plon püi ne m’thei ciah kya ci. Jesuit ng’htòi gui cu a mi pheng’leng ung a cun ah gänap ne bi lo khai hlü ci ci cu Pauline am hmat hlak ci gùi ah kya ci.
A cûn ah kya hleih a cun ah hlü ci gùi a bí vái ah phäh ah Amabile cu a ni ah teihpüi goi ah kya ciah Virgina lah Teresa awn Christu kum 1895 ung The Litille Sisters of the Immaculate Conception ci ah marmah ng’htoi cu m’düih ciah kya ci. Amabile cu a cun ung ka no leng ne Pauline of the suffering Heart of Jesus ci ne a ming m’thong ciah kya ci. Yumtu ng’bum ung a m’sha bi loh gui lah khomang nak gui ung kä ng’kot ng’gei nak gui buiawt tu lang pang ah phih Kei awn a kongät ah Khânpughi a om cu a ngoi ah phih kä maih hnging khai ah ng’ngaih vai ah Boi awn ng’kot ng’et ne ka om ci ci ne pyein ci. A cun ah Khânpughi kei awn a täng ah om a k’cum ah om hnging cu kei ah ng’mü m’cha ah phäh ah m’dang ne kä gah ein ah ka yei ci ci ne phih Pauline no pyein ciah kya ci. Christu kum 1938 ung diabetes yoka gah ne a k’pat lam a kut m’chünpit ah kya ne a mik phih m’cha lo ciah kya ci. A ni cu Christu kum 1942, July k’cha 9 ung shih ci . A ni cu Brazil ghûnkhaw ung maapi k’bäih ne bä ciah k’chang tumat ah kya lo ci.
