Pope Leo XIV cuh cha yah ung a om nak vai “Castel Gandolfo” ah gok ci

Papa shangpughang cuh ca tün neh cha yah ung Papa shangpughang gui ah om nak Castel Gandolfo ah gok ca kya ci. Papa shangpughang a gok lo vai güng ci gui cuh kho noh hlo gui hleih phih ami güng nak ung ami ng’vai hta phih om tu ca kya ci.

Papa shangpughang cuh July k’cha a chuk nak kyün k’hngüp mü hngün täng a kho hi m’khin k’hma yah ung gok ca kya ci. A cun a om nak cuh Vatican ung ka noh 23 miles lo ci ami ci. Papa shangpughang cuh a cun ung July k’cha k’chuk ung ka noh m’ku ah chüt a om khai kya ci. Papa shangpughang noh a hteit vai ah ma neh a pyein a kya hleih yum tu k’chang gui, ga-kap gui, Maamah gui a k’da lo neh do chang lo ci gui. “Ning do chan nei” ci neh ca guk neh khot ci gui ah k’chang ng’bum gui cuh kä gok lo pha ung Cikputi on k’taigü neh güng ci gui ah kya ci.

Papa shangpughang a gok lo lah avan noh “Pope Leo gai neh om mä” ci neh a ng’cum nak cuh läk ci gui. Maameh a k’hmo hta gui kongyi pe gui ci. Cun kon nah a ng’vai gui lah kä gai ci gui cuh kongyi pe gui ci. A cun ung sayadaw a kya ci ah “Vincenzo Viva၊ Andrea Tamburelli၊ lah မြို့တော်၀န် Alberto De Angelis” noh do chan ci gui.

A cun nung a m’shah noh Tatpung ng’yak pui ci gui. A cun kon nah Papa shangpughang cuh a om nak vai im ung khai hlieh k’chang ng’bum gui cuh kyäp kyäp a hteit ba ci gui. Papa shanpughang noh July k’cha 13 k’hngüp ung Missa gänap nak bi khai ci ci gui.