Bä ciah Aquila lah Priscille ah ghinlu a mong
Ng’chu ng’la goi ah kya ciah Aquila lah Priscilla cu Coriinhtu Manggo lah Ephisu Manggo ung bä ciah Polu gunhtot ne om püi man ci goi ah kya ci. Aquila cu Judea k’chang tumat ah kya ne Priscille cu Roma k’chang ah kya ci. Ngani cu Roma k’chang gui awn ng’dün ng’phan ne om ci ci cu ghunkhaw k’ngäng gui am a ni m’dang gui vai ah phäh ah Latin ng’ming ng’hlui ci goi ah kya ci. Polu ah hlo ah ngani cun phih shing hngah gui awn k’pyü coh nak ah hnguh hmat nak cu gah ni ne a cun awn a ni ghinlu ung a ni ei ok nak vai ah ngui shui ci goi ah kya ci. Ngani ah a ni om nak ah im cu k’chang gui hteit ne a mi om nak tu vai ah ng’shong hleih k’chang a daa hteit ne om ip tu hti ci gui ah kya ci. Ngani cu shing hngah awn im coh nak ung Polu awn a täng ah bi bi ci goi ah kä kya ci. Khanpughi ah mong lam thähla m’thei m’thang nak ung a täng ah bi ci gui ah kya ci.
Polu cu court ung a mi ng’shi k’ca kon ah Corinhtu mango ung ka no Ephesu mango ah chüt hleih Aquila lah Priscille cu khah püi goi ne hteit ciah kya ci. A cun ung ka no Polucu Jerusalem Manggo ah ng’däih ne hteit ne Aquila lah Priscille a ni ng’chu ng’la cu Ephesu ung Khanpughi ah mong lam thä hla m’thei m’thang khai goi ah k’poih ghüt ci goi ah kya ci. Ngani cu m’shi nak Sacramentu ah mong ah hlo ah yum nak lam a pi k’chu hmat ci goi ah kya ne Alexandria cu Apolo awn ng’hnguh ni ne ng’kot ne ng’gei ne om ci gui ah kya ci. Aqui lah Priscille cu Apolo am Christian yum nak gui ung ka a k’tung pi ah mong gui cu a mi m’thein kan tu ah kya ci. Polu no Roma mango k’chang gui am a guk ah ca ung Aquila lah Priscille cu Apolo ka vai ah bongbai mah ne bi bi peit man ci ci ne guk ciah kya ci.
