Bä ciah Maria Goretti ah ghinlu a mòng

K’hmo k’tho gui ghung m’htei gui ciah Bä ciah Maria Goretti cu Christu kum 1890 ung Italy ghun khaw ung duyai ciah k’kyawngkhui ung ka noh ng’tüi om lo tu ciah kya ci. A khokum k’ko ung a pa cu shih hleih a nu a nu no lo a bi yah ung Maria Goretti cu a nà k’hmo gui m’htei ne a nu gunghtot tu cuah kya ci. Christu kum 1902, a khokum 18 ung Alexanda ci ne ng’ming nak ciah k’pami hta tumat im kyawng ung Maria Goretti a mät bäng om ciah hmat lo ne a luh shì ah kya ci.A cun ah k’pami cu Maria ah k’khan ah hlokyan shi na hlü hleih Maria no cein ah kä na ci ein ä. Cein ah hlo gui bi cu kat nak om ciah kya hleih Khânpughi no kä yum ci ci ne dam ciah kya ci. Alexanda no a ni ah kyä ung a hlui gui hluh peit ne kya hleih nang am ka kyä ka ning peit ah ta ka shih ni tu ba khai ci ne m’ó ne pyéin ciah kya ci. A cun ah Maria a m’ó cu a lexanda no m’lung k’she ne a hngu lam ah ka no k’khim awn k’daih ne dong ciah kya ci.A k’ten ah seiyum ah donh püi ne ci tu lang pang u hleih phih a kholä düt ah kya ne a shih lo vai ung a ni k’daih ciah k’chàng cu a kat nak ung ka no k’pyhon ciah pyéin ghüt ne ta shih ciah kya ci. A ni a shi yah ung Maria Goretti cu a khokum ghaleigoi vah lo phak ciah kya ci. A lexanda cu thong khui ah khokum thumkip a mi chum yah ung m’dang nak tumat a hnguh nak ung Maria Goretti no papai a bok hta a peit ah kya ci. A k’hngu ah A lexandria no ng’yu ng’yon ba ne Maria Goretti ah a nu am kat nak ung ka no a k’pyhon vai ah ng’shang ci. Papa Shangpughang Pius 12 no Maria ah a nu ah a mikkui k’kaa ah ka no a hta Maria bä ciah k’chàng ah kya lo k’khai ah a taih cu a ng’däih ah ngoiä shüm lä vai ah nga ci ah kya ci. Bä ciah Maria Goretti ah k’taigü nak awn cäi cat vai ah yung aa gui kya lo ne a cun ah m’yung aa gui ung Alexandria ah a m’lung k’hnga a ng’thonghlah cu a k’däm pi ah kya lo ci.