Bä ciah Elizabeth ah ghinlu a mòng
Bä ciah Elizabeth cu Christu kum 1271, January k’cha 4 hngüp ung Aljaferia Mang im, Spain ung ng’tüi ciah kya ci. Spain lah Potugual pakhaui k’chàng gùi no Elizabeth am Isabella ci ne a ming a mi chü ah kya ci. A ni cu Spain kho ung om ciah Aragon ung a k’thum nak King Peter III ah a hta k’hngumi tumat ah kya ci. Ghunkho mòng lam ung m’umcham ne a gah vai äp ne Potugual Shangpughang Denis awn lethtat ne ng’khah ci goi ah kya ci. Ngani ung Alonzo lah Constance ciah a ni hta k’hngih om ciah kya ci. Cun tu pang ah phih Shangpughang Denis cu a k’kyawng khui a í ah kä ng’ngai ne k’kyawng khui a k’ni ah kä m’htei m’hta ciah pa tu mat ah om ih gui cu a ni ung ng’dang lo ciah kya ci. A cun ah kya hleih ngani ah kyawng khui cu k’chang gui ah phäh ah a í ah kä hnguh tu khai gui ah kya lo ci.
King Elizabeth cu mühngün kho ngoi a ni ah k’taigü nak cu a däih ah bi ci ah kya ci. A ni cu k’taigü khai ah a hteh nak ah lam ung a hnguh gui ah lam k’hteit gui lah duyai cia gui am a mi a mi ngoh om nak vail ah a mi eiok vai awn gung htot gui ciah kya ci. A ni ah hta Alonzo cu a pa no a om ih nak gui kä yum ne a pa ng’hngu ng’tuk püi khai ah a ge ah om ciah kya ci. Cun tu pang ah phih Elizabeth cu a pa lah a hta ng’lak ah ng’u ng’sheih nak kä ning ng’kot gui ung ka no ng’gei ba khai goi ah ci hnging ciah kya ci. K’chang a k’daa no Elizabeth am dìmkyäp nak lam pyang ci ah k’chang ci ne leng ne a mi chü lo ah kya ci. A ni cu a cun ah dìmkyäp nak bi hnging ah kya ne Potugual lah Castile k’chang gui ah ng’lak ah om lo hlü ciah ng’tuk ah nak phih kä om ein khai ah ci hnging ciah kya ci.
Christu kum Shangpughang Denis a kyá ah goi lo ne kya hleih Elizabeth no a ni a kya ah m’htei ne ta a ni ah ghinlu phih a ng’thong ng’hlah vai ah k’taigü pe ciah kya ci. Phaya kyawng ah kä hteit tu pang lang ne phih a om nak ung ka no k’taigü ne akya ah k’phe ah m’htei ciah kya ci. Shangpughang cu a cun ah a k’sho yaica lo ne a om k’ka gui man ah phäh ah Elizabeth no a k’pyhon tu peit vai ah ng’hui nak ciah kya ci. A hngeng kum a cei shih hleih Elizabeth cu Franciscan ng’htoi ung yumtu k’chang tumat ah kya lo ci. A ni cu Coimbra ung a yank um a coh te ah du ciah clerea mamah kyawng ah pei ah im hta co ne a ni ah k’poih b ciah a ghinlu kum ghalei ät ung a cun ung om ciah kya ci. A cun ah kya hleih Shangpughang ah mang gui ah khohtang gui cu a mät no m’htei ciah kya ci.
