Bä ciah Thomas ah ghinlu a mòng
Bä ciah Thomas cu 1st century ung Israel ghunkhaw ung om ciah Galilee khaw ah ng’tüi ciah kya ci. A ni cu Thomas Didimus ci ne k’chang gui no a mi hmat ah kya ciah Boi yesu ah hluläk k’chang ah tumat ah kya ci. A ni cu Boi Yesu shih nak ung ka ghing lo ba ci ci cu a mät no hnguh tu ne a hmaleim a kut awn a tok ung vah yum khai ah pyein ciah k’chang tumat ah kya ci. A ni cu India ghunkhaw pum ung Khânpùghi ah mong lam gui thä hla m’thei m’thang man ciah kya ne cang lam ung m’hteng ne Khanpughi ah mong lam bi ci ci ne van no a yum ah kya ci. Bä ciah Yohan ah a guk ah ng’thu k’ni ung a ni cu a k’nga ng’gum ci ne a mi pyein ah kya ci. A ni cu Boi Yesu a ghin lo ba a khan ah a ng’ngai khak ciah k’chang tumat ah kya ci. A ni cu Boi Yesu ghin lo ba ne maapi k’bäih ne a hluläk ng’shä gui ah maa ah a ng’dang lo ba yah ung kä om tu ciah kya ci.
A hngup k’chüüt ung a mi ng’bum ba nak ung vah Thomas cu om tu hleih, Boiyesu no Thomas aw, ka hmaleim ung na kut na tok vai ci ne pyein hleih, Thomas no tok ne ta “Ka Khanpughi, ka Boi aw ci ne pyein ne yum ciah kya ci. AD 52 ung India khaw ung gok ne Khanpughi ah mong lam m’thähla ciah kya c. Thomas cu k’chang a daa a mi m’lung nga ng’thonghlat lo ne Boiyesu yum lo tu khai gui ah pyang tu ne a cun ung phaya kyawng phih a daa co ciah kya ci. A ni cu India ghunkhaw m’htei ciah Bä ciah k’chang tumat ah kya ci. Bä ciah Thomas cu AD 72, December k’cha 21 ung shih ciah kya ci. A ni ah poi k’hngüp cu Roman Catholic lah Syrian Catholic gui no July k’cha 3 hngüp ung poi a mi bi ah kya ci. A ni cu co ng’phlai ci gui, bi bik ci gui lah yum nak lam ung khäng htek hlü ci gui ghung m’htei gui ciah bä ciah k’chang tumat ah kya ci.
