Nu Maria-ah Mong Shui Lei Nak
Trent mango ng’ge ng’shoi nak-ung Boi Christu-ah nu Maria cuh yum äp m’tam khah nak gui läit neh k’bäi ba ci gui . Nu Maria cuh Boi Christu k’chang gui-ah hngu-ah a khah lo püi-ah hlo-ah k’gui cun phih Boi Christu-ah ma-ah khah püi ci ci neh yum-ah kia ci. Ng’mü m’cha lam täng ng’thong ng’hlah bi loh nak-ung Nu Maria-ah om k’ih bi loh gui cuh Christian gui noh ami thei läk vai chin ci.
Kum (16) hngu täng-ung Nu Maria yum äp nak, suh shan nak gui cuh da lo pi hti ci. A caw kia hleih ani-ah mong shui lei nak gui m’thei m’thang nak gui om lo ci. Boi Christu-ah m’thei m’thang nak gui, k’phion nak gui ami m’thei m’thang-ah hlo-ah vang täng-ah phih Nu Maria k’phion nak-ung a ng’dawn nak tu gui cuh ng’ge ci gui.
Marialogy ci cuh Nu Maria cuh ng’thu theing-awn m’täng nak vai, thung k’phyüm gui-ung ani-ah om ih nak gui m’dang ba vai lah ani-awn ng’pak hleih yumtu ng’bum noh am’thei m’cäi cuh shui lei teng m’kyein nak-ah kia ci.
Catholic-ah hnguh , Englican-ah hnguh , Othedox-ah hnguh nak gui shi k’cha kia ci.
Englican-ah hnguh nak
Englican gui cuh Catholic noh a yum-ah hlo-ah avan kä yum lang neh phih a k’tung pi m’thei nak-ah kia ca khanppughü-ah nu, a cum-ah hti theing ki ci cuh yum ci. Nu Maria cuh khapughü lah k’chang-ah ng’lak m’chum pe ca k’chang-ah kia ki ci cuh tuh chü englican gui noh yum ci gui.Englican yumtu ng’bum gui noh Nu Maria-ah poi (6) cuh bi ci.
Orthodox-ah hnguh nak
Greek Orthodox saya gui noh Nu Maria cuh Theotokos ci neh chü ci gui. Cun cuh Greek k’chü-ah kia neh khanpughü hta nak ca chang (or) khanpughü-ah nu ci-ah kia ci. Maria cuh k’chang-ah kia ci , ak’cum-ah hti theing ci ci cuh Orthodox gui noh yum ci gui, m’thei ci gui kia ci. Nu Maria-ah hti theing nak , k’phion nak-ung a ng’don nak tu lah khanpughü lah k’chang-ah ng’lak ni bä nak ceisu gui kia ci ci neh yum ci gui.
Kum phya (20)yah Orthodox yum nak-ung hngu hmat ca k’chang gui noh Nu Maria cuh yumtu ng’bum-ah m’lung lah tüi pyan nak-ah atung pi ci-ah yum ci gui. Cunte Catholic noh a yum-ah hlo-ah kat nak kä om-ein hleih ng’tüi lo ci ci cuh kä yum ci gui.
Protestant gui-ah hnguh nak
Nga mi-ah hnguh nak lei cuh ng’thu theing-ung om ca mong lah hlu läk ng’shä gui noh pyang tham neh ami guk then-ah yum nak hlok vah äi ci gui. Protestant gui-ah ami täng nak cuh Nu Maria m’tam khah nak cuh hma kat nak bi vai hlü-ah hloi ci gui.
John Calvin-ah hnguh nak
John Calvin lei noh Nu Maria-ah k’khan-ah Catholic noh a yum nak cuh kä yum ca kia ci. Catholic gui noh Maria shum chuk ci gui,Maria cuh sintuh düit nei pyein ci. A ni-ah Jeniva ca uk-ung Nu Maria yum m’nai shum chuk nak cuh upatei gäi-ah kia ci ci-ah om ci. Sikputi k’kot ci, k’chang k’bä gui-ah poi bi ci gui cuh ta pe ci. PaPa shangpughang noh khanmopi-ah khah püi hleih vah Nu Maria-ah kyä kho m’dek khan-ah kä hnguh vai ci neh pyein m’sheit ci. Kä cun-ung Nu Maria-ah guh nei ci-ah ng’pum khai hlü ci neh Nu Maria khanmopi-ah ami kai püi cuh hngeng ci. Nu Maria cuh Boi yeisu a hta nak-ah chüt bäng-ah hti theing ci cunkon-ah lei kä hti theing ba ci ci-ah ng’ngai ci. Boi Christu cuh k’chang-ah kia nak lah khapughü-ah kia nak ci-ah k’hngih om neh Maria cuh k’chang-ah kia nak-ah anu hlok-ah kia ci ci-ah ng’ngai ci gui.
Martinluther-ah hnguh nak
Lutherans yumtu ng’bum noh Nu Maria cuh Khanpughü-ah nu,hti theing ca ng’la mi, kat nak kä k’om-ah ng’tüi ci ci cuh yum ci. Nu Maria düit akia-ah m’tam khah lo-ung khanpughü-ah k’phion nak ma mong a ng’ming kä thang ba khai ci-ah ng’ngai ci.
Catholic-ah m’thei m’cäi nak-ung Nu Maria-ah phäh Boi Christu cuh a u-ang, ci lah i-ang a bi ci cuh k’chang gui noh hmat ci gui ci-ah ng’ngai ci. Boi Christu a kia-ah ne tah a nu kä luh lo tu-ein vai shoh khai cä kä ni ca hnguk ci. Nu Maria cuh khanmopi-ah hlu läk ng’shä gui ni,khanhtapup gui noh khanmopi-ah shangpinu ci neh m’tam ci gui. Kho m’dek khan om yah-ung hngei nak-ung a ng’yu vü-ah khanmopi-ah gok tu-ung Shangpinu-awn ng’hnguh lo-ung ka vai mi ng’ngaih tüh shüm ko.
