Bä ciah Petru lah Polu ah ghinlu a mong

Petru cu Boi Yesu no a chü ng’yak ne m’shan tu ba ciah Boi ah hluläk k’chang tumat ah kya ci. A ni cu nga k’shui ah kya ne nga a pha awn hlumlei k’chang tumat ah kya ci. A ni cu Boi Yeisu no a hngu ah a läk vai ah a chü vai am a shämko khohhtang gui a van nong ghüt ne Boi ah a hngu ah läk ciah kya ci. Boi Yesu no a ni am Petros nang cu lung kpo ah na kya ci ci ne a ming hlui ciah kya ci. A cun yah ung om ci gui ah bi bi ciah phan k’chang gui ah hlo ah Petru cun phih ca kä ng’thei tu ciah kya ci. Petru cu kä ng’aa ein ne a í phih a bi vai ah a ng’ngaih bi ciah kya ci. A í phih kä ng’ngahtüh ne pyein ne a bi hlü bi mit mit ciah kya ci. Kho a kya ah k’chi goh ne a kya ah mü ung Galilee tui k’khan ah hluläk k’chang gui ng’hlei k’ko ng’cum ne tui k’kam ah a mi gok yah ung Boi Yesu tui ah khan ah a lo cu hnguh ci gui ah kya ci. Boi ci ne a hmat kon ah tui k’kyo g ah kyum ne Boi Yesu ah hteit ci cu Petru ah kya ci. Boi Yesu a müihmai a ng’thong hlah yah ung phunghta k’thum coh vai ci ne pyein ci cun phih Petru ah kya ci.

Boi Yesu a ghin lo be kon ah Galilee tuik’kam ah a hteih ghü yah ung a cun ah hteit ghüi ci cu a ni ah Boi ci ah hmat lo ne Petru no a hluihlak gui a k’ten ah hlut ne Boi Yesu ah om nak ah a gok vai ah hteit ciah kya ci. A ng’ngahtüh ah ta a m’lung ah thüihlei yeikyai nak gui no Petru ah om k’ih k’bui ciah kya ci. A cun ah kya hlüngtai ne däm ciah yei tu vai a mong gui phih kyai, thûk ne thüihlei vai gui ung cu yei loi thüi loi ciah kya ci. Boi Yesu no a ni cu Jerusalem ah hteit Khai, Yaikya buit awt nak gui a hlü hlü hnguh khai ci ne Boi Yesu no pyéin hleih Boi aw shin ah kä ni ci gui näng Boi ah k’khan ah kä gok ein hlä ci ne ci pyein ci. Petru awn ng’toi hleih a k’cum ah a mi m’dang hti ah kya ci. Polu a m’lung nga a ng’thonghlah nak ah poi cu January k’cha 25 ung a mi bi hti ah kya ci. Polu cu Judea k’chang tumat ah kya ne hnguh hmat k’chang tu mat ah phih kya ci.