Kchò pùmà ng’äi lah kyawng ca
Kchò pùmá ng’äî gui cuh tuhchü u noh kä mcu ba ci.Pùghí pìghí gui no ami htá nà gui ah ami ih lo vai ung pùmá gui mthêin u netah ip màn ci gui.Pùmá ami pyéin ah kphêi ah ng’äî hta gui phih mcupah pah u hleih ni tu hngá ciah akhmó gui no ngngài man ci gui.Cun ah pùmá ng’äî gui u noh kä guthén hleih akdá pí cuh maih lo ci.A cun gui ung kah pìgò amshak ung ami mcû man cuh”Pùkhò hlô hlôÛi ah mkyelep ka phô nak vai pùkhó hlô hlôPùkhô hlô hlôMô neh ngkyô ci ka hlô nak vai púkhò hlò hlòPùkhò hlò hlòAkshô ka ngshô nak vai pùkhò hlò hlòPùkhò hlò hlòNghtò neh nghtò neh ka lûm nak vai pùkhò hló hlôPùkhò hlô hlôMòpí khò khtí ka gäng nak vai pùkhò hlò hlòPùkhò hlò hlòKa lô kä mghó en khai pùkhò hlô hlôPúkhò hlò hlòAkhmó akthô hngün thoh nak vai pùkhò hlô hlôPùkhó hlô hlòKphlô ni mchô ni ka chán nak vai oùkhò hlò hlò”Shin ah ng’äî cuh akhmó hta gui noh khò kä hlò ba neh a kya lo ung a hlô lo ba vai ah khò khngì ami bêit ab kya ci.
Pùkhò ci läi cuh pùghí khò khngì ami pyéin hlü ah kya ci.Ûi ah mkyelep ci läí cuh kchò pùmá ami pyéin nam ung ka noh lo ci.Cun ah pùmá cuh u noh kä pyéin ba ami khmih nak ung ka kya netah ng’äi bäng a mton ah kpoih ba ci.Cun ko ah akhmó htá gui no vingving ah kä ngghî en neh ami mcu vai ah pùmá ng’äî tumat om ci.Shin läí cuh akhmó noh i hlok ah kä be shoh en neh vingving ah a pyéin hnginghmatnak vai bi ah kphêi ahgaih vai phih ngcô lo nehakhmó gui am yèikyàinak phih pe neh kchò tän kkhêi phih a ng’äî ng’om a hàyâ ah kphêi ah gah tu gé ci. Ng’äî ng’om läî cuh”Sheo ä ci hleih ka shehShìsheh lung ah ka sheh Tumat ah ka sheh.Shep ä ci hleih ka shehShìsheh lung ah ka shehKhngih ah ka sheh.
Shep ä ci hleih ka shehShìsheh lung ah ka shehKthùm ah ka sheh.Shep ä ci hleih ka shehShìsheh lung ah ka shehKphlì ah ka shehShep ä ci hleih ka shehShìsheh lung ah ka shehKhmà ah ka sheh. Shep ä ci hleih ka shehShísheh lung ah ka shehKchuk ah ka sheh.Shep ä ci hleih ka shehShísheh lung ah ka shehKchüih ah ka shehSpep ä ci hleih ka shehShìsheh lung ah ka shehKchéit ah ka shehShep ä ci hleih ka shehShìsheh lung ah ka shehKkô ah ka shehShep ä ci hleih ka shehShísheh lung ah ka shehGhà ah ka sheh”Kchò kyawng kài khmó gui ah phäh ah nî bä nak gui pe ca ng’äî ng’om gui cuh khap neh mi shû ba ung thùng yò on htahtana mkhännak vai phih ana nghlôi lo khai kyah hleih mi ktäih ba ko.
