Kyü Tak mah kia-ah-ung k’aw m’hlo neh suh shan vai. Poi k’kyong-ah kah k’hmo hta noh mikmi-ah k’aw cuh ak’cum-ah ng’yak ci. A caw kia hleih k’dim kyäp hta shuh shan vai hlü ci. Hngüp ät-ung k’hngi m’chin m’cawt hlok a dim kyäp nak shui neh shuh shan vai hlü ci. Suh Shan yah-ung phih na poi k’hmuut neh ani kavai shan peit vai a cung vah k’hmo noh ani kavai shan peit-ah hmat khai.
K’hmo hta gui Miksa gün ap nak-ung khah püi gui vai. M’shah noh k’hmo gui tah düp-ah kä om ci gui ,k’pam cai ci gui ci-ah Miksa gün ap nak-ung kä khah püi hlü ci gui. I akia kung phih k’hmo akia-ung phih hluk tu neh ,alok lak-ung kho im k’pung-ah khah püi neh m’cäi vai. K’se dam neh kä ci gui vai kä cung-ung kho im kiüh lo khai gui.
Mü kä ih pha-ung k’hmo gui-awn atäng-ah suh shan vai. A k’hmo gui-ah pei-ah m’khuk dawng neh suh shan vai. A cung vah k’hmo gui noh a i shan i hlo cha shan gui cuh hmat lo tu hlü khai gui.Suh shan nak-ung ami ng’don tu vai-ah chü tu gui vai.Khanpughü-am i ang na shan hlü i ang na shüm hmat hlü ci gui ng’shi neh a gän lo tu vai ci vai. A k’sho k’hma kä m’thei gui vai.
K’hmo gui-am Boi yeisu lah Nu Maria-ah pung gui ami hnguh mik vai ci vai. Catholic yumtu ng’bum gui-ah im päng-ung kho k’kyak om chin ci. A cunah kho kyak gui-ung Boi Christu lah Nu Maria -ah pung gui ,k’chang k’bäi gui-ah pung gui tai vai. K’hmo gui noh hnguh u neh ami hmat lo tu hlü-ung m’thein tu gui vai.
Yum nak-awn ng’pak ca video gui , cauk gui ami yum-ah ghü hlak gui vai. Ng’thu k’theing-ung kah gui Puma vai hlü-ah m’thein tu gui vai. Yum nak-awn ng’pak ca video gui teng püi gui neh m;thei tu gui vai.
Yumtu ng’bum-ah bi loh nak gui-ung hteh tu hlak gui vai. Yumtu ng’bum k’hmo k’tho gui-ung hteit tu neh ami bi loh tu vai ci gui vai. Ng’äi ng’lam gui ami gän-ung poi gui-ung khah püi gui vai.ami bi loh ami k’tha nak gui phäh m’tam gui vai. Nga mi-ah ng’khai-ah phäh-ah Nupa gui ami yei tu-ah mong lah ami ng’khai nak gui cuh Khanpughü noh m’hngi ca mong cuh m’thein gui vai.
A van kyüm be ca k’chang kä om ca mong cuh ami hmat vai m’thein gui vai. A nupa kä om ci gui lah kä ng’chüih ng’khawng ca k’chang gui ami m’om nak-ah kyong gui-ung k’hmo gui khah püi gui cuh ami teih püi gui ami m’gein thei vai phäh lah m’hngi nak ami m’dang thei vai phäh a k’ni pi kya ci. A täng-ah ng’gü ng’lah püi gui vai. A sha hlo ng’gü ng’lah püi gui khai ami nupa kä om ca k’hmo gui ak’da om ca mong m’thei gui vai. Bi loh gü go nak-ung phih m’cha nak kä om vai lah k’chang gui ami gung tu thei vai m’thein tu gui vai.
K’hmo gui-am pei-ung om ca mong gui m’thein gui vai. Khanpughü noh a tüi hmüt-ah mong gui ,kho k’hngi ,m’dek, k’cha ai hli gui lah a hngun k’ghüng gui-ah mong m’thei gui vai. Hta k’hmo gui-awn a täng -ah lam k’hla hteh nak-awn cun gui m’thei tu gui vai ak’ni pi kia ci.
K’hmo gui-awm gah-ah tah peit taak nak-awn m’lung-ah yei nak om tu ba ca mong m’thein gui vai. Hlui hlak ,gü go nak , lum nak gui k’hleih neh phih kyai kä mang ba-ah khoh gui boh kiai teih püi gui-am peit tu gui cuh ni ca mong a kia cuh m’thein gui vai. Peit taak nak-ung yei kiai nak om ca a kia-ah mong m’thei gui vai.
K’hmo gui-am Khanpughü ami m’tam tu hlü vai m’thei gui vai. Khanpughü noh ng’müng van a tüi pan-ah mong ,ei ok vai gui ana k’hmüt peit-ah mong gui m’thein gui vai. Myata m’cu püi gui neh Khanpughü-ah ni bä ami m’tam khah thei vai bi püi gui vai.
