Bä ciah Cyril ah ghinlu a mòng
Bä ciah Cyril cu Christu kum 375 ng’tüi ciah kya ci. Egypt Khaw Alexandria Mânggo ung ngoh ciah Taigü Mâng ah a be ah hta ah kya ciah Cyril cu a pukdäm ah ngoh nak ung Christu kum 412 ung do ciah kya ci. A cun yah ung Alexandria Mânggo cu Christan htahtana bi nak ung kä hlüngtai tup ha ciah kya ci. Syril cu a ni ung a kya a ci hlü a bi hlü gui cu om kheng geng ciah kya ci. A ni cu cang ciah a ng’ngaih ung a k’ghat ghum ah m’hteng ne ghung ciah kya ci. A ni cu a ng’ngaih ghuih ghuih ah a m’lung phukpit ne bi hti ciah kya ci. K’chang gui awn a í phih ng’cu hnging ciah kya ci. K’chang ng’htoi gui no phih a ni k’bäi ci cu a kya ah kä om ci ah a ng’ngaih cu ung a cun ah ng’htoi gui cu a thing ah kya ci. A ni cu Judea k’chang gui Alexanria ung ka no k’täm ne nga mi gui ah khoh tang cu ghunkhaw k’chang gui ka vai ah a tha ah kya ci. A ni cu ghunkaw uk ci gui ah ghunkho mâng gui awn phih kä ng’gei ciah kya ci. A ni cu Egypt khaw ah a yan om man ciah yumgong vuata läk ci gui phih a mi shi lut lo ciah chüt hleih k’täm gui ciah kya ci.
K’hta nem nak lah kat nak gui a daa awn be ciah a ni hngo htitheing ciah ghinlu awn ghing om hnging ci ci ne hmat cu a shin ah bä caih k’chang ung mi hmat tu hnging ciah kya ci. Cyril cu Boi Yesu am Nicodemus ah ng’shi k’ca gui ah m’shan nak ah kya ci. Mi mi gui cu a k’thai ah mi ng’tüi ba hnging ciah kya ci. Hngün a sho lo lei lei ah hlo ah Cyril cu a pi ah k’chang no a pyein nak gui phih kä khan lo ba hnging ciah k’chang ah kya ne a ten ah k’chang a m’shan tu ba hlü man gui cu nong lo hnging ciah kya ci. Cyril cu Nestorius vuata a ng’päng ah a m’dí vai ah khawng mang ne bi ciah kya ci. Kä cang ci gui ah vuata khawng mang ne bi ciah Nestorius cu Christu kum 428 ung Constantinoble ah kaingchuk Taigü Mâng ah kya lo ci. Boi Yesu Christu ung Khanpughi ah kya nak lah k’chang ah kya nak ng’hngih om ciah kya ci. Cun tu pang ah phih a cun ah k’hngih cu kä ng’pong ci goi. Boi Yesu ah k’chang ah a kya nak ah kyä cu Muh Khanpughi a om nak ah kyä ah vah kya ci. Nu Maria cu Boi Yesu hta nak ci. Cun tu pang ah phih Yohan ah guk nak ah ng’thu k’ni ung om ci cu a k’cum a ng’däih ah om ciah Khanpughi a hta nak ah kä kya ci ci ne Nestorius no a m’thei m’thang cu Cyril no kä k’bäi ciah kya ci. Nestorius ah vuata cu Boi Yesu k’chang ah kya nak a ci a mong m’lep düt ciah kya ci. A cun ah kya hleih Cyril no k’pyhon nak ci ah yum ne m’thei m’thang cu m’dí ci ci ne Cyril cu Nestorius awn a ni ng’ngaih kä ng’hmat ne kä ng’gei ci goi ah kya ci. Bä ciah Cyril cu Christ kum 444, June k’cha 27 ung shih ciah kya ci.
