May k’cha cuh Sikputi k’cha-ah a kia lo mong
May k’cha cuh sikputi k’cha ci neh Catholic yumtu ng’bum noh kä k’bäi ci. Cung phih May k’cha cuh Nu Maria-ah k’cha ci neh m’hngi yei m’hlüng m’tai nak bi ci gui. Sikputi cun phih ng’thu theing hta ci neh chü ci gui. Sikputi m’cu cun phih Boi Christu-ah k’phion nak ma mong shüm nak ba-ah k’taigü nak kia ci. A caw kia hleih sikputi cuh Nu Maria noh a yum tu pi-ah suhshan k’taigü nak kia neh ,Nu Maria lah sikputi m’cha neh kä gah-ah hlo-ah ,Nu Maria lah May k’cha-ung Nu Maria m’hlüng m’tai nak cuh m’cha neh kä gah kia hleih yumtu k’chang gui-ah m’lung-ung ng’bäi püi-ah kia ci.
A k’cang-ah Catholic yumtu ng’bum noh sikputi k’cha ci neh k’bäi-ah k’cha lei cuh October k’cha kia ci. October k’cha cuh hti theing ca sikputi k’cha phih kia ci. Kho kum (18778-1903)ah ng’lak-ung yumtu ng’bum uk ca PaPa Shangpushang Leo(13) nak k’chang k’bä noh sikputi lah Catholic kyong khui gui-ah im k’kyong sikputi sik nak-awn ng’pak hleih a (13) nak ca gu then ci. Cun-ah a guk then nak-ung October k’cha cuh sikputi k’cha-ah a k’tung-ah ka ghü ceing nei . Sikputi poi k’hngüp cun phih shin-ah k’cha-ah a (7) hngüp bi nei ci neh ng’thu shä ci. Cun-ah bi vai-ah a kia lo cuh kho kum (1571) a (7) hngüp-ung Christian gui lah Turaky gui Laypanto ci-ah ng’toh nak-ung PaPa Shangpushang-ah m’cäi-ah ci-ah kho m’dek pum om ca Christian gui-ah sikputi sik nak suhshan nak gui, Christian ga k’kaap gui noh phih thai neh sikputi sik suh shang k’taigü u hleih k’chang shing k’thum-ung shing ät vai hlok kyen tu ba ca Christian gui noh ng’ghung neh ami tuk nak püi gui-awn Turaky gui ami m’chüp gui. Sikputi-ah m’yung aa-awn Crusic ng’tuk nak nu cun phih ng’nän nak-ah October k’cha a (7) hngüp cuh cuyah kum (1566-1572)tah chüt yumtu ng’bum khong mang ca a k’hma nak Pius k’chang k’bä noh phih hting theing ca sikputi poi k’hngüp-ah kum täi hleih bi vai-ah k’bäi ghüt ci.
May k’cha cuh sikputi k’cha i hlo cha a kia lo-ang? A htük pi-ah May k’cha cuh shing hngah khu lim gui am’guh pai lo ba yah hngun k’thai ng’thawn lo ba nak-ah k’cha ah kia ci. Europe lam täng-ah kho hlik pum hlui tak be neh kho a k’ching aih yah phäh hngun k’ghüng gui van shik ki vai hlü kia yop ci. Hlik ng’pyi neh kho a cha lo ba thai-ah-ung shing hngah khu m’gho gui m’kyim lim lo ba neh,bung k’om chi hla gui ami yei kiai lo ba yah cuh May k’cha-ah kia ci. Cun-ah yei tu vai lah Nu Maria-ah ghün nak cuh ng’ pak lo ci. Nu Maria cuh Khanpughü-ah pyan tham nak-ung ak’ni pi ak’kiom pi papai tumat-ah kia ci. Nu Maria-awn Khanpughü noh kho m’dek k’phon nak cuh bi ci. Nu Maria-ung-ah om lo ca Boi noh ana k’phion nak gui-awn mi ghüing lo ba ci. Shik ca kho m’dek cuh Nu Maria-awn ak’thai-ah ak’thai-ah ghüng lo ba ca kia hleih May k’cha cuh Nu Maria-ah k’cha ci neh ami ng’ngaih nak-awn yun äp m’hlüng m’tai nak gui bi c gui.
May k’cha cuh Easter ching-ah phih kia ci. Catholic yum tu ng’bum noh Pasca thuuk ca ma mong gui cuh ng’tüh bi loh hnging vai-ah kho k’hngüp (50) cuh pe ci. A cun-ung mikmi avan khanmopi-ah ka noh ana k’phion ba gui-ah hta k’hngu hta k’pa gui-ah na m’thong ba gui ca shih nak-ung kah ghüng lo ba ca boi-ah m’yung aa cuh ng’ngah täh ba kia ci. K’phion nak ang’kiüm ak’be pi gah ci cuh Nu Maria-ah kia ci. Nu Maria lah Easter,Nu Maria lah ahta Boi-ah k’phion nak gui-awn Pasca kä gok pha-ung kho hngüp k’thum Catholic yumtu ng’bum noh poi a bi hlak nak-awn May k’cha cuh Nu Maria-ah k’cha ci neh k’bäi kia ci.
Karih gui-ah yum nak-ung Maia ci-ah kho gam nu tumat om ci. A ni cuh Hamez ci-ah kho k’nget-ah nu-ah kia ci. A yan m’ghu ng’tha ci gui noh m’shi ami sho lo vai-ung a cun-ah Maia-am geit ami m’hleh m’khoi vai phäh voih peh man ci gui. Ngami cuh Boi Christu yum lo tu u neh Christian-ah kia lo tu u hleih Maia-ah ahngün-ng Maria noh thong lo ci. Maia cuh kho nget Hamez-ah anu-ah akia-ah hlo-ah ,Maria cuh k’phion ca Boi Christu-ah nu-ah kia ci. May k’cha-ung Maia-am ami gän ap man gui cuh Maria-am gän aap lo ci gui. A caw kia hleih May k’cha cuh Nu Maria-ah k’cha-ah kia lo ci. A cang lei-ah Catholic yumtu ng’bum noh October k’cha cuh sikputi k’cha ci neh k’bäi ci.
