Bä ciah Josemaria ah ghinlu a mong
Josemaria cu a ng’däih ah k’taigü ne Khanpughi awn a ghinlu a pong nak ung hlüntai ne Christian ghinlu ghin nak ung Saya tumat ah kya ci. A ni cu Christu kum 1925 ung Taigü Boi ah kya lo ne kho dung phe ng’leng ung om ciah Taigü kho ung leng ne Khanpughi ah mong lam gui bi ciah kya ci. A cun ung khokum goi a sho lo kon ah Madrid ah ng’plon ne Law ca ng’ng’thei ne poih lak ciah kya ci. Madrid Mânggo ung om ciah piggo k’chang gui awn ng’hnguh ne ng’hta ng’ko ciah kya ci. Kho m’de lam ung bi loh gui a bi loh yah ung thûk ciah m’mü m’cha lam lä ne a bi hning vai ah ng’ngahtüh lo ciah kya ci. Khanpughi ah mong lam bi lo ci gui ah Boiphaya Mamah gui bä ah kä kya hleih yumtu k’chnag gui no a k’hngüp täi a mi ghinlu ung Khanpughi ah Boi Yesu ah hngu läk ne htitheing nak shui ne ci cu a ni no m’läng m’khang ne pyein ciah kya ci.
Christu kum 1982 A ni cu a mät hta no kyünhloi ne Retreat a bi yah ung Khanpughi ah bi loh gui “Opus Dei” ci ah bi cu leng ne bi ciah kya ci. A ni ah lam m’shüm nak awn Spain ghunkhaw yat ne a cun bi lo hnging ciah kya ci. A a í ah mäih ah yai ca nak a büiawt tung phih a ghinlu cu Khanpughi am gänap ne om ciah kya ci ci ne k’chang gui no a ni cu a mi yum ah kya ci. K’chang tuhmat cu a ghinlu ung a k’ni ah Khanpughi awn ng’pong ne a om hing ung Khom’dek lam ah bi a bi nak ung htitheing nak hnguh khai. A k’ni ah k’taigü ne om ung a í phih lam ah phih ng’hloi khai. Kho ngoi ung ka no mühngün ah chüt hleih Khanphughi awn a täng ah om vai ah k’tha nak vai. A í bi ung phih k’taigü na ah ng’lat khai bi hnging ci ne pyein ci.
A ni ah yum nak cu Kho m’dek pum ung k’chang gui am hmat hlü hlak ciah kya ne Josemaria Escriva cu Christu kum 1946 ung Roma Mâng ggo ung leng ne bi bi lo ciah kya ci. A ni cu a kyä phih kä gai ne a bi loh gui phih daa aih hleih a buiawt gui daa tu lang pang hleih phih kä thüihlei ein ne a k’cum ah yeikyai ne om hnging ciah kya ci. Bä ciah Josemaria Escriva cu Christu kum 1975, June k’cha 26 ung a tenhta ah a m’lung ng’düm hleih shih ciah kya ci. A ni noh a shi lo vai ung apyein ghüt cu Khom’dek cu Khanmopi ah khai nak vai ah lam tumat ah kya ci ci ne pyein ciah kya ci.
