Mindat ung om ca lòng kdäm guiHmâ
Thà(တိုက်နယ်တစ်)ung kah hmâ lòng,Kchâ Thà(တိုက်နယ်နှစ်)Kchâ Lòng,Khmóng Thà(တိုက်နယ်သုံး)ung kah Khmóng Lòng,Khngìgüng Thà (kä cung) khngìyûng(တိုက်နယ်လေး)ung kah khngìgüng Lòng gui lah Dâi Thà lah Mkàng Thà ung ung lòng kdäm gui phih om ci.A cun ah lòng gui cuh hlíp täng ah ka noh htum täng ah lòng neh Mvákhò tuîlìnú gui ung ngdòn ci gui.Htum Kchò Khò ung khòtûi ùh-tuh kthùm om ci.May kchâ ung ka noh November ah chüt hleih còishî ca ùh-tuh ah kya ci.Khò a kya ah â ci.A shängshäng ci vai ah mdek ngmin hngô hleih â shàn ci.November ung ka noh February ah chüt hleih hlik yah ah kya ci.Thermometer ung cendegrade o ah chüt hleih hlüng neh m’yu ci.Cun tu pâng ah phih khngüüp yah gui ung khò khngì pyang om neh apí oh ci.Februay kchâ kshùng ung ka noh May kchâ ah chüt cuh chà yah ah kya neh akya ah ngling neh kchong ci.A ngling cuh cendegrade 40 ah chüt hleih 1500 meter ung om ci.Akhòtüî ah pyéin ung uh-tuh gui cuh kä täng neh ngthong nghlat ci.Khòmhtûng khlüng lam täng ah akya ung khò k’â on gêitnak cuh dó lam ah tah kchâ kthùm ngdót ci.Akhlŭng lam täng ah avan düt ung tüihngâ a päk ung khò chà ah kchong neh tûi ket ci.A hngùn kghìng om khòCòishî üt óng neh khò ngling ca gàmkhò avan ung om ca kphyú kkhá kkhìhlá,shingghìng khùmhlâi gui cuh akya ah dá neh bé ci.A ghíng gui ung ktûng pí ah pyéin ung (pins)(အင်တွဲ) om ca a ghíng ah kya ci. Cun ah a ghíng cuh akya ah kyóm neh akûng ah meter kphlì däm neh ahlüng cuh meter 30 hlok ah kya neh mà neh a ngbàn gui cuh pyò neh ngyung bà shàn ci.Kchò gui cuh cun ah shingghìng mang shàn ci gui.A i ah kya hleih ci ung cun ah အင်တွဲ la neh mêi ngshünak ah mang shàn ci gui.Aktúng pí ah ani cuh nghtâ noh kä èi hnging khai mdek kkâ ah khännak vai hlü ah nglín nak ung mang phya ci.Tuhchü cohngphlài nak vai ah ah nak gui ung át lo píhtî ci gui.Ghunkhò mät no cíngcì hlû (စက်မှု)ah phäh ah shing kplí(သစ်စေး)ah bi hlak ci.Mshì ah hlô ah mlì ca aghìng gui phih dá neh aphú kyŭì ci.Dò kkok gui ung meter phya ghà hlok gui ung aphù kyüì neh kä dí hnging ca a ghìng gui hnguh hnging ah kya ci.Cun gui cuh ghunkhò no ka na ci.Kyúi ghíng akní tumat cuh meter 6 däm neh 50 meter hlüng ci.Kchò akdá pí cuh ami kpyü im lo ung ami ngdükhò ung om ca gò akdá pí ah mang ci gui.Gò phih ahlühlŭ om ci.Cun gui cuh khò a ngling nak lam täng ah akdá pí ah ghíng ci.Cung meter phyamkù ah tah hlüng tu bà ca mhtûng gui ung akya ah yô neh mlít ca gò gui om ci.Cun gui cuh ngdükhò kchàng gui noh shêitó ah phih kyai,yùtô ah phih kyai mang ci gui.Shin ah a hlüng nak gui ung shing ghìng gui cuh kpân hlêi neh apúm ah ngbat hleih teng ung pùmá ung ka vai hlü ah kya ci.Shin ah tah a hlüng lo tu ba ung 1.5 meter däm ca (holly forests)gui hnguh lo ah kya ci.Pyînhtìt khngìlô lam mhtûng ngtän ah kya ca Alps mhtûng gui ung om ca nghlìng ghíng gui,strawberry gui om ci.Htum Kchò khò ung shing ghìng aktôi khlâ akdá om ci.Kchèipâi ahlühlŭ phih om ci.Kä teng kevek teng ung kyóm lo píhtî ca vabók,lòng ngmèn,vóihtá ahlü ahngäî om ci.Irish kchèi pâi gui phih mhtûng kchung gui ung om ci.Himalaya ung om ca kchèipâi gui phih om ci.A ghíng cuh meter 2 hlüng neh mhtûng akhlüng 1400 ah kkhân ah hlüng tu ba ci ung ghíng neh August kchâ ung pái ci.
