Kchò chü among
Myanmar ghun khò ung pakkhúi phyâ lah kthùm kip-lêi khmà om ci ciah van noh pyéin ci.A cun ah pakkhúi gui ung kah akda cuh tumat ah kchî tumat no ahmat ah k’o lah kchi nglùng a pi hta düt nglak nak ci gui ah kya ci.Pakkhúi tumat lah tumat ani kchî kä nghmat ciah akya ung vah Ingkalik no pakkhúi tumat ah kchi [ language] ciah a hluîbah pyein hlak ah kya ci.Kchò gui no kchò ciah ami pyein hlü cuh mvá no [ ချင်း] ci neh apyéin on täng ci ci cuh van no mi hmat ci.Cun ah kchò gui cuh Bangladesh ung om ci ah kchò.India ung om ci ah kchò lah Myanmar ung om ciah kchò ah ngpài ba ci.
Myanmar ung om ciah kchò gui ung phih kchò pakkhuí ngpaì gui pakkhúi tumat lah tumat kchī kä nghmat ci gui kä dá ci.Hlíp kchò khò lam ah laì kchò, zomi kchò gôi lah kya ne htum kchò khò ung mrô, kbàtú lah Mindat Kanpalat ung om ciah kchò gui ah kya ci.Cun ah pakkhúi kdäm khmà cuh tumat ah kchî tumat no kä hmat ciah kya neh pakkhúi kdäm ah Kchī [ language] ah kya ci.Mvá khò täng ah pyéin ung Ashô kcho lah Yò kchò ung om ciah Dó [ တောင်သား] gui ah kchî cuh ahêi pakkhuí gui no kä hmat tu ci gui ah kya ci.Acun ah language ciah nüt dòng nak on teng lo ah a kya ung a ghunkhò púm ah kcho pakkhúi 53 ah ami pyéin cuh ngah-tüh ba vai kya lo ci.Pakkhúi kchī [ language] nüt dòng nak on pyéin lo ah akya ung ghà kä phlän khai ah hmat hnging vai ah kya ci.Kchò kchî kdäm ngpaì ung ka noh ngpaì ba kshòn ci gui ah kchî ngpâi gui cuh Ingkalik gui no dialect kchî k’ó ngpaì ah a pyéin ah kya ci.Mindat lah Kanpetlet khò ung phih tumat lah tumat kä nghmat hnging ah kchī khngih kthûm va om ciah kya ci.
Mindat ung teng lo ba ah akya ung phih kchô kchî tumat ah kkâ ah k’o ngpaì hta gui ah kya ne pakkhui tumat lah tumat nghmat ei ba yop ah kya ci. A cun ah k’ó ngpaì gui ung kah khmóng thà lah kchâ thà ung om ciah kchī cuh a kdá pí noh ami hmat ah kya ci.Akhngih nak ung kdäih ne mi teng khai.
