Oignies Manggo ung ka Mary ah ghinlu a mong
Mary cu Franciscan ng’htoi ung maapi k’bäih ne Mamah ah kya lo ne a mät no a mät ng’phep nak awn kyün hloi ne htitheing ne lang hta ciah ghinlu ung ghing ciah kya ci. A ni cu ng’büh ng’mang k’chang nupa ah hta k’hngumi ah kya ne Belgian ghunkhaw ung ng’vai lo ciah kya ci. A ni a kho kum 14 ung a ni ah nu lah pa no ling ne ng’büh ng’mang k’chang kyawng khui ung ka k’pami hta tumat awn a ni lethat hlak ni hleih Mary no a k’kyawng ah ka am a pyein cu “kei ah ng’lami ah ka kya, theinthap ciah ghinlu cu a m’htei peit vai ah pyein hleih a cu ah a kyawngkhui ung ka no phih a cun a läk tu peit ah kya ci.
Mary ah ghinlu cu Cardinal James de Vitry ung ka no vah k’chang gui no a mi hmat tu ah kya ci. A ni cu Mary ah kat nak phleh gui ng’ngai ne kat nak k’phyon pe ciah kya ne a phan ah k’chang tumat ah phih kya ci. Cardinal no Mary ah om k’ih läk lam gui a kya ah ni ci ci cu m’dang ni pyein ciah kya ci. Cuntu pang ah phih a ni ah ghinlu cu a cang ah kä kya ci vai hlü ah a m’shah no ng’ngai ci. A ni cu Khanpughi ah maa ah k’taigü ne a mät ah om ih bi loh gui a ghinlu a mong a ng’ngahtüh yah ung a mik tui a kya ah a luh lo hti cu Khanpughi ah bäkäk nak awn a gah ah mik tui ci ne a mi pyein ah kya ci. Phaya kyawn k’pe ah khan ah ng’kyak ciah a ni ah miktui cu teng ne a ni ah m’khan nak vai lam hmat ciah kya ci.
A ni cu Boi Yesu Shing m’kang k’tung khan ah taih ne a mi ngong ah mong gui a ng’ ngahtüh ba täi hleih a í kä shüm ba ne kya ci ciah kya ci. Mary ah om nak ah k’chang gui a daa htei ne om tu hti ci gui ah kya ci. A ni ah ghinlu a k’hngu pi khokum k’hma cu mü ni k’hngüp ni k’taigü ne om ciah kya ci. A ni cu Christu kum 1213 a khokum 38 ung shih ciah kya ci.
