Bä ciah Aloysius gonzaga ah ghinlu ah mòng
Bä ciah Aloysius gonzaga cu k’tho k’tho gui ghung m’htei gui ciah bä ciah k’chang tumat ah kya ci. A ni cu Christu kum 1568 ung Italy ghunkhaw Mantua a pei ah om ciah Conzaga pa k’khui k’chàng k’kyawng khui ung ka no ng’tüi ciah kya ci. A ni ah a pa ah a ng’yakhlü a bi hlü man gui a kyümbe vai ah a ni cu gakat lam ung ng’thei ng’thang gui ah hnguh hmat vai gui ng’thei ng’thang tu ciah kya ci. Cun tu pang ah phih nga mi gui no a mi bi ah mü ei tumat ung hteit ne ei a ei tu khengeng vai ah kya lo hleih a cun ah mü ei ung hteit ne ei ei tut e ci. K’chàng ng’büh k’chang k’bä gui ah ng’lak ah kä ni ciah a mi om k’ih gui cu hnguh lo ne a cun ung ka no Khanpughi lam ah ng’hlat ne k’tha na ne k’taigü nak ah ghinlu ung om khai ah ng’ngai lo ci. A ni cu ei lah tui cu kho hngüp k’chüih ung k’thum vei kyünhloi ne om ciah kya ci.
A ni cu a mät no a mät htung awn m’ghuih ne om ci. Mü kho coih ah a ih nak ung ka no let lo ba ne lung k’po gui ah k’khan ah m’khuk khu dong ne k’taigü hti ci. A ni cu shihla lam ung a mät no a mät phep ne k’hngumi hta gui gui mâ lam ah a mi lo ung kä hnguh ein gui vai ah k’kâ teng ne lam hteit ciah kya ci. India ghunkhaw ung ka Jesuit ng’htoi ung om ciah Boiphaya gui no a mi buiawt man gui a mi guk ah ca a k’khei awn ah a ni cu a cun ah Jesuit ng’htoi ung Boiphaya a kyat u hnging vai a m’lung phukpit ciah kya ci. Christu kum 1585 ung a ni ah a pa no kä k’bäi tu lang pang hleih phih a ni ah gah gui vai ah khoh htang gui nong ghüt ne Roma Mânggo ung om ciah Jesuit ng’htoi un glut tu ciah kya ci. Kho k’hngüp phlikip lei ät sho lo hleih a ni ci ah a pa cu Boi Yesu ah kut ung a k’dìm a kyäp ah shih kya ci.
A hta no a nong ghüt ung ka no leng ne a pa cu a ghinlu a k’ni ah pyang tham ciah kya ci. Mät no mät m’lung m’däm nak ah phäh ah buiawt vai gui cu hmat ne k’chang gui shong cik ne m’ei m’ok vai ah bi khai ah ng’shang ciah kya ci. Christu kum 1591 ung plague leiget gok lo ne kä gai ci gui a teng m’htei nak awn a ni phih goi tu ne shih ci. A shi yah ung Aloysius cu a kho kum 23 va lo pha ciah kya ci. A nu am a guk nak ah a k’hngu pi ah ca ung Khanpughi awn ng’mang chum ne m’shung k’chuk püi ciah shih ci gui ah phäh ah thüihlei ne Khanpughi ah m’hngih nak kä m’dí ein vai. Mi k’mi ah ng’cha nak cu a k’sho ah kä kya khai. Mi k’mi gui cu Khanmopi ah tumat lah tumat mi ng’hnguh ba khai ci ne guk ciah kya ci.
