Bä ciah Romuald ah ghinlu a mong
Romuald cu a k’hmo hta yah ung kyüih kyok vai buiawt man ciah kya ci. A ni ah a pa cu a kho k’chang tumat awn khohhtan shüm ko nak awn ng’cu ng’gen ni ne a pa no a cun ah a kho k’chang cu a ngon man ah kya ci. A cun ah a ngon cu Romuald mät no a mik awn hnguh man ciah kya ci. A cun hnguh ne a kya ah kyüh ciah Romuald cu a ng’et ung om ciah Yahteih kyawng ah dong ciah kya ci. A cun ung kat nak gui ah phäh ah Khanpughi am ng’hui na ne a ghinlu k’taigü nak awn be hleih k’tha na ne om ciah kya ci. A ni no k’taigü nak ung a k’tha nak cu a po teihpüi gui ah phüh ah m’lung k’she nak ah kya lo ci. Romuald no a pyein cu Yahteih gui no läk vai ah läklam gui a k’ni ah pyantham ba vai hlü ci ci cu a k’ni ah ng’ngahtüh lo ciah kya ci.
Khokum 30 a kyawng ah Italy ghunkhaw pum hteihton ne Yahteih kyawng gui co ne yahteih gui ah läklam vai gui m’hlüng m’tai ba ne pyang thanm ba ci. Hungary ung Khanpughi ah mong lam thähla vai ah a kot a om lo yah ung a kyü kä gai lo ba ciah kya ci. Romuald no Yahteih gui ah a mi om ih kä ng’dhung ng’hei ne läklam vai gui kä mi läk ba gui cu k’tha na ne bi lo ba ciah kya ci. A ni ah k’tha nak cu Yahteih gui a u no phih kä k’bäi tu ciah kya ci. Ng’thonghlah vai kä yum ciah Yahteih gui no Romuald am a ghong k’puk ne kya ci gui. A bi ah kat nak ah kä kya ciah kya hleih a u no a I a pyein ung phih kä k’chü ne düm ah khan düt ciah ci.
Romuald cu Shangpughang ah a hta no a peit ah ng’hle tumat la tumat awn a m’thong ah kya ci. A cun ah a m’thong kon ah va a ni cu Boi Yesu awn ng’et lo pi hti ciah ng’ngai ciah kya ci. Romuald ah phan ah k’chang gui ung ka Peter Damian cu Romuald awn ng’pong ni ne Yahteih kyawng tumat a ni coh ah kya ci. Christu kum 1o12 ung Camaldoli ung phih Yahteih kyawng tumat a coh ah kya ci. A cun ung Benedict Yahteih gui ah m’hteng ciah läl lam vai gui a hngun ghing lo ba ciah ci ba hnging ciah kya ci. Dimgei nak no khotui phei ng’leng ûp ne kyünhloi ne om nak cun phih a kya ah m’hteng ciah kya ci. A m’sha Yahteih gui no Romuald cu a kya ah ghatghum ciah k’chang ci ne pyein ci gui ah kya ci. Christu kum 1072 ung a mät ah om nak ah khan hta ung a u no kä hmat ah shih ciah kya ci.
