Kyawng-Khui ung a i ang a hlü?

Im Kyawng-khui ung a i a hlü ci cuh mat vai khin ci. Nu lah Pa, Nu Pa lah a k’hmo ciah tumat lah tumat ng’ngaih ng’hmat vai hlü ci a kya ci. Nu pa noh a m’thei ah a k’hmo vah hnguh mat thei ci, K’chang gui on om tu thei ci, ng’hloi hlak khai om thei ci. Kyawng khui ung kä ng’hloi neh a kya ung a hei a k’pung ung a om ih nak ung phih kä ng’hloi ci ah kya ci. Nu lah Pa ng’tuk ci goi ah a kya ung a k’hmo phih ng’tuk tu thei ci. A k’hmo noh thei bäng tuk ci. Cun a kya hleih a k’hmo cuh a nu pa ah kya ang kho ah kya tu ci. Cun a kya hleih Nu Pa gui ng’ngaih nak vai a k’da om ci. Hta hmo gui kavai ngui shui vai hlü ci te vah cun a tah hlü tu ba ci cuh a k’hmo gui on a täng a om pui gui vai hlü tu ba ci. A k’hmo gui m’hngi vai, ngami gui on a ching pek neh om pui gui vai hlü ci.

Sayamah tumat noh a k’hmo tumat a ng’shi cuh, ” Na Pa a i bi ci ang a ci?”. A k’hmo noh m’shang ba neh a pyein cuh,” Ka Pa cuh Setyung ung bi bi ci. Chocalet gui na thak lo htei ci. Ka ei hlü na thak lo ci. Ka ng’yak hlü lo pui ci. Bi ng’tha nak neh bi ci, gai ci. A shawng ung na ng’lah pui ci. Ka Pa ah phäh ka yei hti ci. Mü täng yung a buma na m’thein tu ci.

Cun a kya hleih a k’hmo gui noh ngui a i chü mi gah kä teng ci gui. A i hlok a mi m’thei gui, a i hlok mi om pui gui, ngami kavai a i mi ng’ngah tüh peit gui cun vah ngami gui noh hmat ci gui ah kya ci. Nu Pa gui lah a k’hmo gui ung m’hngi nak a be lo pi htei vai ah mi k’taigü ko.