Kho-im ah kä hteh hlü ca k’chang gui ah phäh ah

Ka teih püi aw, “Khanpughi cuh a hoi phih om ci ci neh, kho im bä bä ung Khanpughi shum chuk neh gah kä kya ci. Na pyein cang ci. Cun te a pi ah ng’plei ci. Khanpughi a hoi phih om ci ci cuh cang na mo. Im ah phih om ci, lam ung phih om ci, kyong ah phih om ci , a hoi hteh ung phih Khanpughi om khai.

Cun te vah, Kho-im hteh bä bä ung Khanpughi shum chuk neh gah kä kya ci na ci cuh m’lung kyong i boh kya ci. Teng lo kheng ung, a ca pyein ca k’chang gui cuh a hei gui Kho-im ah hlet neh Khanpughi ami m’shum chuk yah ung ami gok nak ah ka noh Khanpughi m’shum chuk u neh ang? ce ka ning shi hlü ci.

Pyein phung cung tah, a kya mi ih hlü ung a hoi phih ip neh gah ca mo. Lam pei, shing ghüng k’ka, lam lung gui ung phih ip neh gah ci. I kya hleih om ih nak vai im gui mi coh ng’phlai ang? I kya hleih ih nak ah hteit neh mi ah ang? Ei ana m’cawi gui ung, im k’ka, shing ghüng ka ni, vah ah hnguh nak im k’düma shawng cih ei awk ne gan ci. Cu ung i vai mei dung mi pyan ang?

Ka teih püi aw, mik mi gui a i mi bi ung phih, mi kya hlü hlü ah i bi hlü hlü ah mi bi ung gah ci. Cun te theing thaap nak hting ling nak a om ung kä ni tu ba ci ma? Ih nak ei shawn nak, ng’no hta im gui mi coh cuh mi gai gong nak vai phih hlü tu k’cang ci. A cun ah hlo ah kho-im mi coh cun phih mikmi ah ng’müm cha phih k’tha gui a ng’khap ba vai k’chang a k’da on a täng ah ät neh shum chuk m’hlüng m’tai nak hnging vai phäh kya ci.

Khanpughi a hoi phih a om cu cang ci. Khanpughi a hoi phih om ki ci neh van ah k’pam cai nak lam pei ung ah k’taigü neh gah ci ma? Gah hngo khai, cung phih a k’taigü kä kyäp khai, Khanpughi ah k’aw phih a ng’yak vai khak khai. A cun a kya hleihm mikmi gui van noh pum kyä m’lung m’cha a van ung Khanpughi mi m’hlüng m’tai hnging vai phäh kho-im cuh coh ng’phlai ah kya ci. Ng’ngah tüh tu ba shüm ä, ka pyein cang ci ang? A k’cang ah lei k’hngüp chüih ung kho hngüp ät hta a can k’shawn mä k’hngi m’chim 2 bäng nei, Khanpughi am kä na pe tu ba hlü ci ma? Kho-im kä na hteih a phäh ah, u noh phih kä ni shüi chak khai, m’cha khai lei cuh, Khanpughi nei. A ni noh avan hmat neh, avan m’cha m’lang khai. A khng pi ah tumat ka pyein hlü cuh na pyein ah hlo ah Khanpughi cuh avan ung om ci, tu mat lah tumat a kyum lo nak kä täng ci. Cun te ng’bum ng’bäi nak unbg Khanpughi noh a kyum lo nak cuh m’hngi pi ci. BAn ah ng’bum nak kho-im kyawng ung Khanpughi cuh a mong k’phlei on ng’dang neh om ci.

1. Khanpghi m’tam vai neh ng’bum ca k’chang gui ah ng’lung ung om ci.
2. Khanpughi ah ng’thu ng’ngaih yah ung om ci.
3. Khanpughi ah bi bi ca k’taigü Bawi ung om ci.
4. Bawi ah Shi-hla Sacrament ung ng’dang pi neh a om ah mong cuh na hmat tu via ka ng’yak hlü ci.
5. Ät neh k’tài-günák. “ Nangmí àm, ka piéin bà mä cuh m’dek’khãn-ah a i pang-tah k’hngih k’thum ng’gèi ät neh nami san ung Khãnmòpí-ah ka Pá nawh ning pe gùi khai. 20 A i-ah kia hleih ci ung kei-ah ng’ming awn k’chàng k’hngih boh, k’thùm boh ami ng’bum ung ami ng’lùng-ah kei ka om khai,” ci ci. ” ( Matthew 18:20)