Bä ciah Hypatius ah ghinlu a mòng
Hypatius cu a htük pi ah Christian yumtu ng’bum ung yomghong a hlü hlü awn ng’buiawt ciah kya ci. Boi Yèsu Christu ah Khanpughi ah a kya nak lah k’chang ah a kya nak cu a täng ah ng’pong ciah kä kya ne a phäh phäh ah om ci ci ne Nestorianism no m’thei m’thang ciah kya ci. A cun cu Hypatius no kä yum ne a pheng peit ah kya ci. A ni cu AD 15 yah ung yum nak lam vuata ung kyäp kyäp hta ah vüt ne lut lo ciah kä ni ci gui cu m’chüt näng yop ciah kya ci.Chalcedon Mânggo pei ah om ciah a u no phih kä om nak ba ah Yahteih kyawng k’pyüm nu cu k’chàng gui m’kyüh m’kyok ci ci ne a van no kä mi k’et hlü ah kya ci. Hypatius cu a cun ah kyawng k’pyüm nu ung kyün hloi k’taigü nak vai ah pyang tham ne ta a cun ung om ne k’taigü ne om ciah kya ci. A cum ah k’taigü ne om caih a ni ah phäh ah a í no kä m’kyüh m’kyok ciah kya ci.
Hypatius no a cun ah Yahteih kyawng ung Christian ng’htoi tumat a m’düih a kya ci. A ni ah Yahteih tumat ah kya ciah Callinicus no Hypatius ah ghinlu a mong cu a guk ah kya ci. A cun ah a guk nak ung Hypatius cu Phrygia ung ng’tüi ci. A ni ah pa cu k’chàng gui no kyüh ah ne a mi yum ngak tu ah hnguh hmat k’chàng tumat ah kya ne a m’thei m’thang phih a kya ah ni ci ah saya tumat ah kya ci. Hypatuis cu ca a ng’thei yah ung hnguh hmat nak ung ng’hngän ne kä ghuih hleih a pa no m’ghuih ne a ci hti ah kya ci. A khokum 18 be lo hleih a im ung ka no Thrace ah dong ne htomé hta gui voh m’htah ne om ciah kya ci. Kho k’hngüp äp ung m’gho k’ghüng gui ah khan ah ng’düi ne m’lá ne a ng’äi cu Taigü Boi tumat no ng’yak ne a ni ah k’o cu a kya ah ng’ngaih phyak ciah kya ci ci ne a ni am Salan ng’äi gui í hok kya ng’äi ci cu m’thei tu ciah kya ci.
Cun kon ah Hypatius no Jonas ci ne ng’ming nak ciah gakap k’pyhüm tumat awn ng’teih ng’püi ah kya lo ni ne nga ni a ni ni k’hngih cu Yahteih ah kya lo tu ci goi ah kya ci. Yahteih ah kya lo tu ne Retreat bi ne düm hta ah k’taigü ne a kya yah ung a pa no a ni cu shui ne a hnguh ah kya ci. A pa lah a hta tumat no tumat kat nak ung ka no k’pyhon ni ne a k’ni ah k’kot ba ci goi ah kya ci. Constantinoble ung Jonas k’poih na ghüt ne a im ah hteit ba ne ta Chalcedon a pei ah om ciah Yahteih kyawng k’pyhüm nu pyang tham ba ne Yahteih kyawng ah a lat ba ah kya ci. A van no a yum ah vuata cu a cun ungka no ghung m’htei ne Nestorius ah vuata cu ng’hngu ng’tuk püi ciah kya ci.
