I kia hleih Kotomyat cuh Shumchuk chin-ang?

Kho m’dek k’chang k’chang gui k’phion vai bü ceng nak-awn Boi Christu cuh yumtu ng’bum-ung k’cum-ahom ci. A tung pi-ah m’shum chuk m’hlüng m’tai nak bi loh ya-ung ak’cang-ah om ci. Miksa gän ap nak-ung a Boi Christu cuh ak’cang-ah a ng’dang nak gui om ci.

Boi Christu cuh

1.Shuh shang khai k’chang ng’bum-ng

2.Boi-ah bi bi ca k’taigü Boi-ung

3.Khanpughü-ah ng’thu k’theing ng’ngaih-ah-ung

4.Kotomyat Secramentu-ung ak’cang-ah om ci.

Boi Christu cuh ak’tung pi-ah miksa gän ap nak muk lah capyitui-ung om ci. Muk lah capyitui cuh boi christu-ah shi lah hla-ah ang’thawng lo nak-awn boi christu cuh shin-ah secramentu-ng om ca kia ci. Boi christu cuh apum kyä lüng-ah kotomyat-ung ng’thup neh om ci.

Miksa gün ap nak-ung Boi christu cuh muk lah capyitui ah müi k’ka-ah ak’cang-ah aom cuh mikmi Catholic yumtu ng’bum noh mi yum ca kia hleih kotomyat secramentu cuh m’shum chuk m’hlüng m’tai-ah kia ci. A caw kia hleih mikmi-ah yum nak ng’bäi neh mi m’dang nak-ung m’khuk dawng neh lu kop neh üm tha nak gui mi bi ci. Catholic yumtu g’bum noh kotomyat cuh miksa gün ap nak bäng-ung kä kia hleih amät-ah phih shum chuk m’hlüng m’tai tu nhga neh yumtung’bum gui noh üp htak hleih ami m’hlüng m’tai hnging vai-ah kotomyat cuh k’pung-ah k’plok neh ,ng’kyün neh ,ng’gui ng’nong neh m’shum chuk m’hlüng m’tai nak gui cuh bi ci gui. Kotomyat cuh im hta cawh tu pe hnga neh m’om-ah bü ceng nak cuh go pai ci gui lah miksa kä kai tu hnging ca k’chang gui miksa k’pung-ah peit hnging vai phäh kia ci. Kotomyat-ung Boi Christu a cang-ah aom-ah mong yum ca Catholic yumtu ng’bum cuh muk lah capyitui-ung om ca boi christu dim kyäo hleih m’hlüng m’tai shum chuk nak-ah thuuk ca among cuh hmat lo pi hti ci. A caw kia hleih kotomyat cuh caw tu hnga neh m’om neh Boi Christu-ah ak’cang-ah a om nak cuh m’dang vai kia ci.

A toi pyein-ung Catholic yumtu k’chang gui kotomyat ami m’shum chuk m’hlüng m’tai cuh muk lah capyitui-ah k’kiong-ah a canh-ah a om cuh ami yum-ah phäh kia ci.