Bä ciah Banabas ah ghinlu a mong
Bä ciah Banabas cu k’chang gui a dâ awn ng’khot ng’gei ne om thei ciah k’chang tu mat ah kya ci. A nu pa no a hlui ah a ni ah ng’ming cu Joseph ah kya ci. Cung phih k’chang gui a dâ no a nii a mi hmat nak ah ng’ming cu Banabas ah kya ne Son of Encouragment ci ne ng’phlan ciah kya ci. A ni ah mòng lam gui cu Actu ung mâpi k’bäih ne ng’yak ah kya ci. A ni cu lai bi ne a gah ah ngui cu yumtu k’bum ka vai a van gänap peitak ciah kya ci. Banabas cu yumtu ng’bum m’kyüih ne ghüh tu man lang ne phih Polu a m’lung k’nga ng’hlat lo ne Christian gui no a mi k’bäi lo vai ah pei ah ka no a ng’chüih ah ng’düih pe ciah kya ci. Christan gui no a mi hmat ah Polu cu Christian gui ngon ciah k’chang ci ne a mi hmat ah kya ne a mi kyüh ah kya ci.
Cun tu pang ah phih Banabas no Polu Christian gui no a mi do tu hnging vai ah hlü ciah lam gui ung gung htot tu ciah kya ci. Banabas cu Polu ah Khanpughi ah mong lam thähla m’thei m’thang ne a hteih hton nak ung a cun ah läk tu ciah kya ci. Nagni a ni ni k’hngih cu Khanpughi ah ng’thuni gui k’tha na ne thä hla m’thei m’thang ci goi ah kya ci. Boi Yesu ah hlüläk k’chang gui am Christian gui ci ne a mi chü nak ah kya ciah Antioch Mânggo ung yumnak ung ng’chüih ciah yumtu ng’bum tumat a mi k’hmoh hnging ah kya ci. A cun ah Mânggo ung om ciah Christian gui no Banabas lah Polu am a hei kho ung htei ne Khanpughi ah mong lam a ni m’thei m’thang vai ah pyein u hleih ng ani cu a cun phih k’bäi ni ne nga mi ah pyein läk ni ne a ni gok nak ah Khanpughi ah mong lam a k’tha pyhat ah thähla m’thei m’thang ci goi ah kya ci.
