11th June (Daily Reflection)
Báwi-ah kut cuh ngami gùi-awn om ät hleih zùm ci gùi a k’dá cuh Khãnpùghí lam-ah ng’hlat lo zop ci gùi. Ngamí-ah màwng cuh Jerusalem k’om, zùmtu k’bum nawh ng’za lo u neh Antioch-ah Barnabas tüì ci gùi. Ani, gok lo nehtah Khãnpùghí-ah m’geinnák hnguh lo neh zèi tu nehtah cun-ah k’chàng gùi nawh Khãnpùghí zùmnák ami m’khän chêng geng vai-ah, m’düih m’thoh gùi neh k’thá m’cüng gùi ci. Ani, (Barnabas) cuh k’chàng k’ní-ah kia neh Muh-Htí lah, zùmnák-awn phih bé ci. k’chàng gùi a k’dá cun phih, Khãnpùghí zùmnák-ung ng’khap lo tu ci gùi.
Cun kon-ah ani cuh Saulu sùi vai neh Tarsus-ah hteit ci. Hnguh lo neh Antioch-ah, khah püi ci. Nganí goi nawh a kum púm, cun-ah zùm tu k’tu a ng’um gùi cuh, hnguh teng gùi ni neh béit m’cäi, m’thei m’tháng gùi neh om ci goi te. Cun-ah zùm tu k’tu-àm, asin-ah Antioch-ung vah, mà k’bäih neh Christian gùi ci neh ami hlui lo gùi htük-ah kia ci.
Cun zah-ung, ce ng’sä m’sah gùi cuh, Jerusalem-a ka-nawh Antioch-ah kium lo ci gùi. Ngami gùi-ung-kah, Agabus ng’mìngnák ci-ah tumat nawh ng’düí lo neh “Khàw m’dek púm-ung ei khàw zõ lo khai,” ci neh Muh Khãnpùghí hlu-ah ng’cä ci. Claudius mãng-ah kut-ung, a cun-ah kia neh ei khàw zõ k’càng ci. Cun-ah, zùm tu k’tu phih, a u nawh phih a m’chüt hnging phäh phäh-ah ng’htòng u neh Judea khàw-ung om ci-ah, phäí-nàü gùi cuh, gung m’htéi gùi vai ci neh piéin ci gùi. A cun-ah ng’htòng u neh a cu-ah om ci gùi-àm ani thak gùi vai-ah, Saulu lah Barnabas-àm m’kan goi ci gùi.
