Bä ciah Magaret of Scotland ah ghinlu a mòng  (1046-1093)

Hungry ghunkhaw ung ca ng’thei man ciah Magaret cu a k’cang ah a kya ung St. Edward ah Mâng ím ung ka no k’chàng ah kya lo tu ciah kya ci. A ni ah a pughi cu King Edmund ah kya ci. A ni ah a nu cu Hungary shangpughang  ah a hta hngumí ah kya ci. Norman k’chang gui no England a  mi tuk lo yah ung a ni cu a cun buiawt tu ne yai cá ciah kya ci. Magaret cu Hungary ah hteit ba khai ah k’tha na hleih phih  Scotlang tui k’kam ah htinpo dí hleih kä heit bah lot ciah kya ci. Shángpùghang ah pa k’pak k’khui k’chang gui ah ka vai Christu kum 1070 ung Scotland Shángpùghang  King Malcolm awn k’kyawngkhui khoi ne om ci goi ah kya ci. A ni hta k’chüit lo ne a hta k’pa ng’vai pi cu Shàngpùghang David ah kya lo ci. A ni cu hlüngtai pi k’bäih ciah Scot Shángpùghang gui ung tumat ah kya hleih van no yum ngak ne a mi m’hlüngtai ah kya  ci.

A ni cu k’taigü nak ung khänghtek ne k’chang gui m’hngi yei na ne taga ciah k’chang tumat ah kya ci. A ng’shong yah ung K’taigü nak, ca k’khei nak, Phaya kyawng kyom htang khai ah pyantham nak vai ah chi tho ne ci ci. A ni cu Scot ng’büh mang k’chang gui ah m’cìnhngün ah kya ciah Dun fermline ung Benedict Yahteih ng’htoi ah kyawng tumat co ciah kya ci. Magaret cu a cei ah khan ah a k’ni lam un guk ci ci ne Magaret ah ghinlu a mòng guk nak ung ng’dang ci ci ne pyéin ci gui. Shangpughang cu a ni ah guk kä k’khei tu thei lang pang ne phih, Magaret ah ca guk gui ci m’nai tu ne yei tu ciah kya ci. Shanpughang no a ni ah ca uk gui cu kyom khai ah pyan peit  ciah kya ci. Magaret ah bi loh nak gui ung Boi Yesu cu hngünhok ne bi ci ci ne hnguh ciah kya ci. A cun ah kya ne a ni ah ng’yak hlü gui, a ni ah läk lam gui cu Shangpughang ah ng’yakhlü, Shangpughang ah läklam gui ah kya lo ci. A bi loh nak gui awn bongbai ne a k’tha kä om lo ba hleih  Magaret cu a khokum 47 ung shih ciah kya ci.