Ng’ngaih tüh tumat

Kho htui gok lo ba neh kho aa ci ciung phih, tui noh kä na lawn gui neh ng’lei nawh a na lin gui vai ah mi bi lawh hta gui mi ng’ngaih nak vai ah hlu lawk thai ah ng’ngaih tu nei.

Shing chuk lo bi ah a kyakung phih, avan hla gei kä chuk yop vai, tui khawng, tui long ah a pei ang k’kho, tui a lawn nak ahlong m’ghawk gui ah a pei gui ng’ngaih na hta neh mi nawng neh kä mi chuk ung bä tuk khai ah ng’ngaih tu nei.

Cung kon nah, k’pyu im kyoh tu vai ah a kyakung phih, hlü ci ah k’tung lah ng’pen ka vai bäng shing mi chuk vai hlü khai nei. Shing cuh chuk vai läi a shäng hta te vah, geit ba vai m’htei vai cuh sho khai ah kya ci.

K’cho kho läi ah kä kya hnga te ci, lam hteh yah ung lam pei ah chuk neh ami hei m’shün va guiah mät nawh a ca yai neh geit man te ah, shing gui hnguh ung m’lung phih kä yei ci nei.

K’cho kho cuh a htük ge ah kho a tu pi ciah kho kyak ci. Kho k’aa tui gui da neh a lawn law ung shing ghing gui bäng nawh vah tui kä däm vai. m’dek kä ng’min vai na gung tu gui khai kyak ci.

A cung kya neh, m’däm ung na m’däm tu ba khai läi mi ng’ngaih nak ge ung bä tu ba khai nei ci neh ka ng’ngaih tüh hta tumat ka ni m’thein tu gui nei.

Avan na mi bä ni.

Shing Shing