Boniface ah ghinlu a mong
Germany ghunkhaw ah Khanpughi phan ah k’chang ah kya ciah bä caih Boniface cu Christukum 673 ung England khaw Cregiton mânggo ung ng’tüi ciah kya ci. A ni cu yum ghong ci gui ah a ng’khok k’chang gui Christian yum nak ung a mi gok lo tu hnging vai ah k’tha na ne bi lo ciah kya ci. A kho kum k’hma ung a ni ah im ah om lo tu ci gui ah Yahteih a m’shah awn a mi ng’hta ng’ko gui ng’ngahtüh ba ne ta a mät ah ghinlu khanpughi am gänap khai ah a m’lung pukpit ciah kya ci. Nursling ung om ciah St. Benedict Boiphaya ng’htoi ung lut hleih a cun ah kyawn ung hlü ci gui pyeinhlak k’nga k’plak khai ah a mi k’hmoh ah kya ci.
Ca a m’thei nak ung a ni ah nghuh hmat nak cu hnguh hmat k’chang gui a daa k’däk hnging hleih nga mi gui ka vai ah Boniface no Latin ca ng’thei ng’thang hnguh hmat nak ah ca gui guk ne pyan pe gui ciah kya ci. Taigü Boi ah a kya lo kon ah ng’thu k’ni ng’yung nak ciah Ovuata gui phih guk ciah kya ci. Christu kum 718 ung Papa Shangpughang a k’hngih nak Gregory no Germany ung Khanpughi ah mong lam thä hla m’thei m’thang vai ah aana a peit ah kya ci. Yum gong gui ah k’phlan ne a mi yum gui a ken lo pi hti vai ah Gudenberg kho m’htung ung om ciah Dobar ah htitheing ciah hngäi ghning cu a chuk ton ah kya ci. Khanmopi ah ka no kat ah phäh ah a mi khan nak vai a mi gün yah ung k’chang gui cu nga mi no a mi yum ah khaw no ngami gui kä ghung gui hnging ci ci ci hmat lo ci gui ah kya ci.
A cun ung ka no leng ne Boniface ah a bi loh gui cu hlüng lo pi hti ciah kya ci. Phaya kyawng gui lah mamah kyawng gui ghukho pum ung co ne m’düih ciah kya ci. A ni ah bi loh gui cu bä ciah kya hleih a k’thum nak Gregory no Taigü Mang ah kya lo khai ah k’hmoh hleih a cun ung ka no yumgong gui am Khanpughi ah mong lam thähla m’thei m’thang gui khai ah a mlung pukpit ciah kya ci. A ni cu Christu kum 754 ung yumgong gui no a mi ngon ah shih ciah kya ci.
