4th June-Daily reflection

Maaneh ng’yak nak ung bä ca Paulu noh Ephesus gui a m’cäi lo neh “Nami ng’ngaih nak vai nei, nang mi gui ni m’cha gui khai cuh lo khai, Bawi ah ng’ming on lo khai gui. Cun tu pang a phih ka ning m’thei gui cuh kä nami hmih en vai, ka ning om püi gui nami shüm ba vai nei. Nang mi ung ka ngui phih kyai, hlui hlak phih kä lak man ci nei. Ka pyein hlü cuh, ” Gah a tah peit tak nak ung yeikyai nak om ci ” ci cuh nami hmat vai nei. A m’thei m’cäi ng’pyi lo hleih avan noh m’khu dawng neh k’taigü ci gui. A cun on a Paul cuh kä hnguh ba ci gui. Bä ca Paulu cuh a bi vai bi yop ghüt neh a m’thei m’cäi nak ung phih avan noh thei läk tu vai khin ci. Mikmi k’chang gui cuh a i phih a k’ni mi gah ung mi yei ci, cun tu lang pang nga phih Paul noh “Peit tak nak ung vah yeikyai nak da pi ci” ci neh na m’thei ba gui ci. A pi a k’da ci ah tah mät a kut cuh peit tak nak a kut a a kya vai mi k’tha nak ko.

Bä ca Johan noh a guk nak a ng’thu k’ni ung Bawi Jesu noh Khanmopi han teng neh a k’taigü lo among a kya ci. Mikmi kavai na k’taigü tu pe ci gui ci ah kya ci. Bawi mi yum ci phung avan kavai ah kya ci. Shin a khom’dep ung mi om yah ung a k’she kha ung a mi pyion vai a Pa Khanpughi ah na k’taigü tu pe gui ci.