Bä ciah Joan of Ach ah ghinlu a mong
Bä ciah Joan of Ach cu Khanpughi ah mong lam bi ci gui ah k’chang gui ung k’chang he gui awn kä täng ne nga tun ga ciah k’chang ah kya ci. A ni cu a yum nak ng’pheng ci ci ne Christu kum 1431 ung k’tung ung chit ne a k’ghüng ah a mei awn m’chih ne a mi ngon ah kya ne Christu kum 1920 yumtu ng’bum ung bä caih k’chàng tumat ah kya lo ci. A Ca guk gui cu gui no a mi yum ngak vai ah bä ciah k’chang tumat ah phih kya ci. A ni cu k’chang ah kya ne a kya ah m’hngiyei na ne kya ci a om ah hlo ah u sheih ne kya ciah k’chàng gui cun phih om ciah kya ci.
Joan of Ach cu k’o gui ng’yak shan ciah kya ci. A cun ah a ng’yak ah k’o gui cu goipyam ne kya ciah k’chang gui a mi m’lung kä dimkyäp hleih a mi ng’yak ah k’o ah phih kä kya ci. k’chàng k’bä gui ci ne Joan mät no a pyein ah k’hnguumi k’hngih lah Khanhtapup Michael ah k’o cu ng’yak ciah kya ci. A cun ah cäicat vai ah k’o gui cu m’ghok gui khei ne English k’chàng gui tüih ba gui vai lah Shagpughang ah hta k’pa ah am thinan a peit ba awn a mät ah om nak ah Pyinhtit khaw a gunghtot ba vai ah a ni am pyein ciah kya ci. A ni am cun ah a mi m’shüm cu Pyinhtit lam ah ka gui a mi ng’ngaihäp nak gui kä om yah ung a gah ah kya ci. A cun ah kya hleih a van ung didam ne ng’hngoih lo ci ah Shangpughang ah ga kap ng’htoi gui uk ne a bi loh vai ah a ng’vai hta tumat am a bi hlak vai ah Joan ah pyein cu Shanpughang ah htak’pa no äi ciah kya ci.
A ni ah bi lo hlü gui Pyinhit ga k’kap a mi kan cu a lu le ng’lat ah ci ne Oreleans ung om ciah kantat cu a mi m’di hlot ah kya ci. Joan cu ga k’kap gui ah hlui gui hlui tu ne Jesu la Maria (Jesu et Maria ) ci ne ng’guk ciah ng’nän nak vai ah a lan kot ne ng’tuk khai ah hteit ciah kya ci. A ni cu Pyinhtit ga k’kap gui kongmang ne ng’tukah nak ung aungtang ne yei hlak gui ciah kya ci. Christu kum 1429 ung ingsheih Minhta cu Shangpughang Charles ah kya lo hleih ca kä hmat tu ciah let htama ah hta k’hnguumi ah kya ciah Joan cu Shangpughang ah pei ah bi bi lo tu ciah kya ci. A ni ah kan a om cu a k’sho läi ah kä kya ci. Kä sho ba hleih ng’tukah nak tumat om lo ba ne pungkan ne ng’düi lo ba ciah Burgundy k’chang gui no Joan pha ne English gui ah kut ung a mi yoih ah kya ci. Joan cu thong khui kyawng ah khokum ät a mi chum ah kya ci. A cun yah ung yumtu ng’bum ung om ciah taya yung ung ka no Joan cu a ng’däih ah a mi ng’dhi ca ah kya ci. I ah kya hleih ci ung a ni cu kä ni ciah kho ng’yo gui yum ne ce ci ci ne a mi puk ah kya ci.
Joan no a pyein lo ba nak ung a ni ah yum nak, a om k’ih gui lah a hmat gui cu ng’dang ei ciah kya ci. Taya yung no a ni am a mi ngon avai ah kat nak tan a mi k’chak peit ah kya ci. Kä htingling ne kä ng’shung ciah ana noh lang hta ne htitheing ci cu a m’chüt ein ah kya ci. Cun tu pang ah phih Joan cu a yum nak ung khäng htek hleih ling ciah kya ci. Christu kum 1432, May k’cha 30 ung a kho kum 19 va lo phak ciah Joan cu Ruen Mânggo ung yoih tuk nak k’chang gui a k’daa a mi ng’bum nak ung k’tung ung chit ne mei awn a mi m’chih ah kya ci. A ni ah k’boih ba ciah a guh gui cu Seine tu nu ung a mi m’hteh ah kya ci. A ni cu k’pa mi gui ah vuata k’bäi ne k’hnguumi gui ka vai ah a mi chüi ah hlui hlak gui cu kä yum ne kä hlui hlük ciah kya ci.
