Tüi pyan nak ci cu Khanpughi no a mät no a mät a m’dang nak ci a mong
Tüi pyan nak ci cu Khanpughi ah a k’htük pi k’bäih ah a m’dang nak ah kya ci. Papa Shangpughang Francis no a pyein cu Khanpughi no a phu däm ciah ca uk tumat guk ghüt ne a cun ah ca ng’lung gui ci cu Kho m’dek khan ah om ciah a müng a tüi pyan gui a hei hei ah ng’kho ng’cha ci gui ah kya ci. Tüi pyan nak ci cu a k’cang ah pyein ung Khanpughi ah a htük pi k’bäih ah Epiphany poi ah kya ci. Htitheing ciah ng’thuk’ni ung om ciah ng’gui hleih a mi pyein lah Khanpughi ah m’dang gui cu Kho k’hngi ah a khang lah mü ah a k’hngüp gui ung om ciah kya ci. Yumtu ng’bum ah a k’htük pi k’bäih ah pa gui a m’shah ah kya ciah Chrysostom no Khanpughi ah ca uk k’hngih ah kya ciah Bi loh vai gui awn seng ciah ca uk lah ng’thuk’ni a mong gui cu pyein ghüt ciah kya ci.
Bi loh gui awn seng ciah ca uk ci cu a dang ah pyein ah a kya ung Khanpughi ah tüipyan nak ah kya ciah Khom’dek pum ah hmai lah a cun ung om ciah a tüi pyan gui ah kya ci. Khanpughi ah bi loh nak awn seng ciah ca uk ci cu kä k’khei tai vai ah a hngun k’ghüng gui ah kä täng ein ne a mi ng’cha nak lah daa ciah a hngun k’ghüng gui ah a mi om nak ah kho m’dek awn a täng ah mi mi gui ah om nak ah mi ng’düim gui cu a van om ciah kya ci. Papa Shangpughang Francis no Taigü Mâng gui awn seng ciah ca a pyein nak ba ung a k’yo hta pi ah kya ciah a hngun k’ghüng gui cu a däm ah hnguh vai ah teng thei ah a kya ung Khanpughi ah tüi pyan gui cu cäicat vail ah kyühaa tu vai ah khäng htek ciah a k’tung pi ah a ng’yung ah kya ci. A cun cu Khanpughi ah cäicat vai ah kya ciah a cum ah a m’dang nak ah kya ci ci ne pyein ci.
Cun kon ah tüi pyan gui tumat hti tumat hti cu ngami ah a mi ghinom kya ci ah kya hleih a mi ng’äi ng’om cu Khanpughi ah m’hngi nak lah Boi ung a mi ng’ngaihäp cu yeikyai ne a mi ghin ah kya ci ci ne phih Japan ung ka Taigü Mâng gui ah guk ah ca cu m’täng ne pyein ba ciah kya ci. Papa Shangpughang Francis no a pyein ah hlo ah a kya ung tüi pyan nak a mong mi ng’ngahtüh ah a kya ung Khanpughi no mi mi am a peit lo gui ah m’thei m’thang nak cu tumat hti ah mi hnguh vai a na peit gui ci ne phih pyein ciah kya ci.
