Papa Shangpughang a k’thai ah kya ciah Leo ⅩⅣ cu dimkyäp nak ah mei k’däi ah kya hlä ci ne Cardinal Charles Bo no k’taigü ci.
Cardinal Charles no a pyein cu, tuhchü, mi mi gui cu a päng a hlü a hngäi mi buiawt ciah kya ci. Ghunkhaw gui ung ng’tukah nak gui om ne, a m’shah ung tui däm hleih k’chang gui shih kyuk ne yai ca genvai ci gui. A kya ah m’coi m’gha ciah mi kho m’dek cu teng düt vai ah kä kya ci. Khanpughi no a chü ba püi ah kya ciah Papa Shangpughang Francis cu a kya ah yum ngak vai ah dimgei nak lam ghunkhaw gui ah hteit ne bi ciah kya ci. K’hma leim be ne kyap ci gui ah k’phli tui gui Pa vai hlü ah ghû ba pe gui hnging ciah kya ci. Ghunkhaw khang mang ci gui ah ma ah ng’bop hta ne, vang ah vei dimgei nak a om ba vai a shan man cu mi shüm ba khai ah kya ci.
Khawng mang k’chang k’ni ci cu k’chang kalu nak ah kä kya ein hleih m’lung m’yo m’nem ne bi loh ci cu kho m’dek pum no a hmat vai ah Papa Shangpughang no bi ghüt ciah kya ci. Cun tu pang lang ah phih ng’tukah nak ah mei k’däi cu câng lo lei lei ne ghunkhaw gui k’chuk hlok ung ng’tukah nak cu om ne k’chang gui a kya ah yaica gein vai lo pihti ci gui ah kya ci. A m’shah gui cu a mi om nak ah im gui, a mi khohtang gui nong ghüt ne bunghgu lam ah dong yop ci gui. A m’sha ah im gui lah kho tang gui cun phih, mei awn a mi m’chih peit gui ah kya ci. Ng’u nak no a uk lo ah a kya ung a u phih kä phyong hnging ciah kya ci.
Vang ah teng ung phih khomdek cu ng’ling lo ne, tui gui cun phih ket lo ci. A I geit ko ba ung phih a caä ka hlo ah kä nib a ci cu mi hnguh ciah kya ci. K’chang gui ah ng’shôn lah khotuiphe ng’leng ah k’chüng k’hlei nak vai m’kyüih m’kyawk ci cu a k’ni ah nga k’phlak nak vai ah k’o cu hlü ciah kya ci. A cun ah kya hleih Papa Shangpughang a k’thai cu Cathokic yumtu k’chang gui ah yum nak gui hlüng lo pihti khai ah bi khai ah a kya ah hlo ah yumtungbum cun phih Boi Jesu awn a ng’pong lo hnging pihti vai ah bi khai ah kya ci. A ni cu k’chang gui ah ng’ngaih äp nak thak lo gui khai ah Papa Shangpughang ah kya ci ci ne Cardinal Charles no pyein ci.
