Bä ciah Philip Neri ah ghinlu a mong
Khanpughi m’hlüng m’tai ne k’taigü nak ah Phayakhan hta gui leng ne m’düih ciah bä caih Philip Neri cu Christu kum 1515 ung Italy ghunkhaw Florence mânggo ung ng’tüi ciah kya ci. A hmo hta yah ung ka ge no a nupa lan k’chang ah pyein ng’ngai ne om man ciah kya ci. A khokum 18 ung cäicat vai a buiawt ung ka no leng ne a ng’chüih ah bi bi, a ng’ngahtüih gui a I kä om ba hleih Khanpughi ah lam m’shüm nak ung a van gänap ne Roma mânggo ah hteit ciah kya ci. A ghinlu ung a ni ah phäh ah hlü ci a I kä om ein khai ah gänap ne, im k’cih kâ ah a mät ah lon nak vai hta düt ung om ciah kya ci.
A om nak tu ah im mah ah a hta hmo gui ca a m’thei tu hlu ah a mät no phih hnguh hmat vai gui phung k’tha na ne ng’thei ng’thang ciah kya ci. A ni cu ngoi ah k’chang k’hmat ah kya lo khai ci ne k’chang gui no a mi äp ah kya ci. Cuntu pang ah phih a ni cu a ng’thei ng’thang ah ca uk gui yoi ba ne didam lo ciah Roma mânggo pyangtham ba khai ah a ci ah hteit ne Khanpughi ah mong lam gui thäla m’thei m’thang ciah kya ci. A ni cu gaih vai ah ng’pyang k’kyam ne ei k’ok a mi yoih tuk na ung hteit ne Khanpughi ah m’hngi nak ah mong thähla m’thei m’thang ciah kya ci. A ni cu Christu kum 1548 ung htitheing ciah pukko k’thum Khanpughi tumat ah Boi phaya ng’thoi cu m’düih ciah kya ci. A cun cu hteit ghüi ne k’taigü ci gui lah kä gai ci gui a mi gunghtot vai ah phäh ah ng’ngahtüh ne a m’düih ah kya ci.
A ni no yum ne a k’taigü nak ah phayakyawng k’chüih om ciah kya ci a cun ah Phayakyawng gui ung hteit ghüi ne Kodomyat Boi Jesu ah a shi lah a hla nayi 40 peng peng m’shum k’cuk ne k’taigü caih kya ci. Christu kum 1544 Htitheing ciah muh Khangpughi ah poi a phik mü ung bä ciah Sebastian ah mangku ung a k’taigü yah ung mei pai tumat a ni ah m’gong ung ka no a kyä k’kyawng ah ch chüt hleih a luh ne a ng’kyang däm lo ciah kya ci. A cun ah Muh Khanpughi awm be ne bä khai ne Boi aw ci ne pyein ciah kya ci. A khokum 36 ung a ni ah ng’mü m’cha lam khong mang pe ciah Taigü Boi ah k’chü ng’ngai ne Boiphaya ah kya lo tu ci.
