Bä ciah Gregory ⅤⅡ ah ghinlu a mong (1028-1085)
Yumtu ng’bum ung däm pi ciah pyantham nak ba gui bi ciah bä caih Gregory ⅤⅡ cu Christu kum 108 ung Tuscany mânggo ung a mi hta nak ah kya ci. Aventine ung om ciah St. Mary Yahteih kyawng ung ca ng’thei tu ne Christu kum 1073 ung a ni cu k’chang a dâ ah k’bäi yum nak awn Papa Shangpughang ah a mi ghü ah kya ci. Papa Shangpughang ah a kya ung ka no leng ne yumtu ng’bum ung dîdam ci gui a van pyangtham ba ne ng’thon ng’hlat ba khai ah bi hnging ciah kya ci. Christu kum 1075 ung Roma mânggo ung Taigü Mâng gui a mi ng’bum nak ung Khanpughi ah a mighinlu peitak ci gui ah hlüngtai nak yoih tuk gui cu kä om ein ba khai ah ci ne Taigü Boi gui ah htitheing ciah ghinlu cu m’hlüngtai peit ba gui ciah kya ci.
Ngami ah om nak ah ng’lei kho ung Taigü mâng gui a mi k’hmo ne a mi ci vai ah ghunkho uk ci gui no a mi shan ah kya ci. Khanpughi ah mong lam kä bi lo ciah k’chang gui düt am hlängtai nak khoh tang gui peit vai ah kä k’bäi ciah Gregory awn Germany ghunkho mang ah kya ciah a k’phli nak Henry awn a ni m’lung ng’ngaih kä nng’hmat lo hleih ng’gen lo ci goi ah kya ci. Henary no a ni ah k’chang gui a mi nong nak ung ka no a düm vai ci ne Canossa ung om ciah yetaik a pun gung ka no a mät no a mät ng’phep ne k’taigü ne om hleih Christu kum 1077 ung Gregory lah Henry cu a ni ah ng’kot ng’gei ne om ba ci goi ah kya ci.
Christu kum 1084 ung Henry cu a ni ah ga kap gui a van khah püi ne Roma mânggo ah khai ne Papa Shangpughang Saleno ah om nak ah htei ne a ciah om tu khai ling ne ah pyein hleih a cun ung ka no tün ne kä ng’kot lo ba ci gui ah kya ci. Saleno ung Gregory cu Christu kum 1085 ung shih ciah kya ci. A ni cu a shi lo vai ta ng’hngün ung a ni ga gui ah kat nak cu m’gein ghüt ciah kya ci. Kei cu taga nak awn om cu m’hngi ne k’chang gui ah kä taga nak gui pheng ciah kya ci. A cun ah kya hleih a tühk’bäih khei cu kho phung got nak ah ka no ka shih ciah kya ci ci ne pyein ghüt ci.
