Bä ciah Rita ah ghinlu a mong

Bä ciah Rita cu yum ngak vai ah hmeinu ah ghinlu yai ca nak awn a phlän vai ah k’tha na ne ta Mama tumat ah a kya lo vai ah k’tha nak ciah ah bä ciah k’chang tumat ah kya ci. A ni cu Patron of impossible Causes, Difficult Marriages, Infertility and Parenthood ciah a ng’ngaih äp vai kä om ba ne kä kya hnging khai ah a mi ng’ngaih gui kya ba ne, kyawng khui ung kä ng’hloi ng’hlak ci gui ng’hloi lo ba ne, hta k’hmo gah hlü ci gui a mi gah hnging vai ah ghung htot gui ciah bä ciah k’chang tumat ah kya ci.

A ni cu Italy ghungkhaw ung ng’tüi ne a k’hmo hta yeh ge ung ng’chüi hleih ng’taigü ne om ge man ciah kya ci. A ni cu a k’hmo yah ung Mama tumat ah kya tu hlü hleih phih a nu lah a pa no a mi thung yo läk ne a cei mah vai pyein ni hleih a nupa ah k’chü ng’ngai ne Polu ciah ah ng’ming na ciah k’pa mi hta awn k’kyawng khui khoi ne om ciah kya ci. Cun tu pang lang ah phih a cei Polu no k’kalu k’duk de na hleih a m’lung ng’shäi khai ah ci ne om püi hleih a k’hngu ah Polu cu a m’lung k’nga ng’lung thong ng’hlat lo ciah kya ci. A ni om nak kho kum ghalei k’chüt be lo hleih a ni hta k’hngih gah ci goi ah kya ci. A cun yah ung a mi pigo phe ng’leng ung ng’u ne k’chang ngon ah thung om hleih Rita ah a ce cun phih a mi ngon ah kya ci.

A mi thung yo lä ne a ni pa ah phäh ah a phu shui  hlü ci goi ah a hta goi am phih m’cäi goi ne mät ah ga ah kat nak ah phäh ah m’gein ne k’phon vai ci ne m’cäi goi ciah kya ci. Cun kon ah Rita cu a cei ngon ci ah kyawngkhui ah hteit ne nga mi gui ah kat ah phäh ah k’phyon gui ciah pyein ne, nga mi gui phih ng’u ng’sheih nak gui a mi nong vai ah pyein ciah kya ci. Cun kon ah Rita ah ma ah St. Augustine , St. Nicholas, St. John the Baptist gui a ma ah ng’düi lo u ne  Rita Mama ng’htoi ung a luh tu vai ah pyein u ne a luh tu ah a kya ung ngami no phih ghung htot tu khai gui ah pyein ci gui. Mama ng’htoi ung khokum 40 kyünhloi ne, Taigü ne, a mät no a mät phep ne om ne ta mä, hlü ciah k’chang gui am ghunghtot peit tak gui ciah kya ci.