A khawtui phei ng’leng a k’chüng k’hlei vai ah a k’thum nak m’chäi nak
(Theological Vision)
Papa Shangpughang Francis no a guk ah Encyclical ung mapi k’bäih ne a guk nak ung mi om nak ah mi ng’dü im a didam lo ah khan nah a k’ni hta ah ng’ngahtüh ciah kya ci. A cun ah a ng’ngahtüh nak ung tuhchü ng’shün ng’phan ciah leiget gui a daa lo m’dang ne, duyai k’chang gui ah a mi kyah cu mi ng’düim khom’dek ah kya ah kya lo ci cu a i gui ang ci cu ng’shing khai ah m’dang ne pyein ciah kya ci. Ng’shün phan ciah leiget cu k’khom’dek ah hmai lah k’chang gui ah om k’ih nak awn kya lo ciah m’dang ciah kya ci.
Papa Shangpughang cu yum nak lam ung khong mang k’chang tu mat ah a kya a hlo ah Laudato Si ung phih a ng’shün ng’phan ah kya lo ciah leiget ci cu yum nak lam awn ng’awih ciah leiget ci ne pyein ciah kya ci. Cun kon ah, Papa shangpughang no a guk nak ung (The Gospel of Creation) tüi pyan nak ah ng’thu k’ni ci ne phih guk ciah kya ci. Mi mi gui cu Papa Shangpughang no a na peit gui ah Theological vision a mong cu mi ng’ngahtüh ne A shun ng’phan ah kya ci ah leiget cu a I hok kya thuuk ciah yum nak lam ung leiget ah a kya lo cu m’dang ne leng ne bi loh vai gui cun phih bi loh vai ah kya ci.
Mi mi gui cu Papa Shangpughang ah Encyclical ah a na peit lo gui ah ng’thu k’ni ung a k’tung pi ah mong goi ah phäh ah k’thu k’ni ah a kya vai ah hlü ci. Maapi k’bäih ne tüi pyan nak ci cu, Genesis Khanpughi ah tüipyan nak ah mong gui mi ng’yak ciah kya hleih Khanpughi ah nibä nak gui cu mi hnguh ciah kya ci. A k’hngih nak ung tüipyan nak ci cu, Khanpughi ah phäh ah m’hngi nak ah thuuk ciah om k’ih ah kya ci. Thuuk pi ciah om k’ih a kya vai ah phäh ah tüi pyan nak ci cu Khanpughi bi bi nak ah ca uk tumat ah kya ah hlo ah Khanpughi ah a htük pi k’bäih ah a m’dang nak ah phih kya ci. Khanpughi no a tüipyan nak ung khom’dek bum a ng’bum nak vai phäh ah kya ci. A cun ah kya hleih khom’dek ah khoh htang gui ci cu, a van awn seng ciah kya ci. Tüipyan nak a pyipäng nak nak ah hngün cu, Boi Yesu Christu ung a k’tung ah ng’pong ciah kya ci.
