Bä ciah Bernardine ah ghinlu a mong
Boi Yesu ah htitheing ciah ng’ming ah hluläk k’chang ah kya ciah Bernardine cu Christu kum 1380 ung Italy ghunkhaw, Massa Maritima ung ng’tüi ci. A k’hmo hta yah ge ung a nu lah a pa shi ni hleih a nu lam ah a k’shung nu no kyawng m’khai ne ca a ng’thei hlak ah kya ci. A k’shung nu no a ni am Khanpughi yum m’hngi ne a kyüh aa vai ah m’thei m’thang ciah kya ci. A kho kum 17 ung Boiphaya ng’htoi ung lut tu ci. A cun ah Boiphaya ng’htoi cu goipyam ci gui a mi yai ca nak ung ka no a gei vai ah ci ne a mi mät ah ghinlu khanpughi am gän ap ne om ci gui ah kya ci. A cun ung a om tu nak kho kum k’chüih be lo hleih Siena maanggo ung om siah St. Francis Yahteih ng’htoi ung lut tub a ciah kya ci.
A cun ah St. Francis Yahteih ng’htoi ung Taigü Boi ah kya lo ne kho kum ghalei goi peng peng meditation gui bi ne hnguh hmat vai gui päng a hnguh hmat vai ah ca k’tha na ne teng ciah kya ci. Kho k’hngüp ät ung koyin tumat no nang ka phäi hta Benadine, nan gung om ciah Khanpughi ah ning peit ah keisu gui kä thup en ä ci ne a k’ten ah ng’düi lo ne pyein ci. A cun ah a pyein cu Bernardine ah a ng’vai hta gui no shin ah k’o cu Khanmopi ung ka no a pyein ah kya hnging ci ci ne Bernardine cu Italy khaw ng’däih Khanpughi ah a mong lam a thähla vai ah a mi tüih ah kya ci. A ni no Khanpughi ah mong lam a k’ni ah thähla m’thei m’thang ne a ci cu ng’yak tu ci gui, ng’thei tu ci gui a van yeikyai ne yum ngak ci gui ah kya ci.
Boi Yesu Christu ah ng’ming cu, Boi ah ng’thu k’ni thähla m’thei m’thang ci gui ah k’taimah nak ah kya ci ne pyein ne a m’theim’tham a ng’päng lo kon ah Boi Yesu ah htitheing ciah ng’ming ci ah a mi guk ah shing pe awn kongki a peit gui hti ah kya ci. A cun ah shing phe a khan ah I.H.S ci ah a mi guk cu Jesu Hominun Salvator k’chang gui k’phyon ciah Jesu ci ah ng’phlan cia kya ci. A ni cu Christu kum 1430 ung läk lam vai gui m’hteng ciah St. Francis ng’htoi ah Vicar General ah kya lo ci. A Boiphata gui am a hnguh hmat vai gui a k’ni ah ng’thei hlak gui ne a k’tung pi ah Cannon Law cu ng’thei hlak gui ciah kya ci. Bä ciah Bernardine cu Christu kum 1444 ung shih ci. A shih kon ah kho kum k’chuk be lo hleih bä ciah k’chang ah kya lo ci.
