Daily Reflection – A phli nak Paschal poi kyün hngüp  ung  ng’yak ah  ng’thu k’ni

******************************************************************************************************************************************************************************

Acts 14: 21-27, Apocalypse 21: 1-5, John 13: 31-33,34-35

Tuhngoi cu Paschal hngün a k’hma nak kyün hngüp mapi k’bäih ne ng’yak nak ah ng’thu k’ni ung yumtu k’bum ung k’kyawng khui gui a daa lo a mong ng’yak ah kya ci. Judea pak khui  k’chang gui lah Judea pak khui k’chang gui ah kä kya ci gui a van no Boi Yesu yum lo ät ci gui cu mi hnguh ciah kya ci. Ng’thu ni (Gospel) ung Boi Yesu no läk lam vai a k’thai na m’thei gui ci. “Kei no nang mi ka ning m’hngi gui ah hlo ah nang mi phih tumat lah tumat m’hngi ng’kyu tu vä ci ne na m’thei gui ciah kya ci. Tumat lah tumat m’hngi ng’kyu ne na mi om ung nang mi gui cu Boi Yesu ah phan ah k’chang ah na  mi kya lo khai ci ne pyein ci.

A k’cang läi ah shin ah ng’thuk’ni cu Boi Yesu kä mi pha pha ung a hluläk k’chang gui awn ei a täng ah mü ei a mi ei yah ung tumat no tumat m’hnging’kyu nak ah mong cu a m’thei m’thang gui pyi ah kya ci. A cun ah mü ei a mi ei yah ung kamät no na leim nak ka kut awn ka tok ung vah naghün lo ba vai ka yum khai ci ne pyein ciah Thomas, Boi Yesu k’thum vei ma khai ah Petru lah Boi Yesu yoi khai ah Juda cun phih om tu ci gui ah kya ci. A cun gui a van hmat ciah Boi Yesu no a m’lung m’yo m’nem nak awn phan k’chang vai hlü ah a hluläk gui ah kho cu m’shi pe gui ci. Boi Jesu ah däm ciah a hngi nak cu a ng’dang ah hnguh ah kya ci.

A cang ah k’chang gui ah m’lung cu nang n ani ung kei kä ka sheit khai ci ah hlo ah mät ah khan ah ni ci gui ah k’chang gui ah khan ah va mät phih nib a hlü ah m’lung ngaih om ci. Tuhngoi ng’yak nak ah ng’thu k’ni ung Boi Yesu no a na m’theim’thang gui cu mät kä na yei na ne na kat nak ci gui, mät ah ghinlu na m’dim’dam hlü ci gui, na nong ci gui ah khan ah a I ng’ngaih äp nak kä om ein hleih m’hngi gui vai ci ne na chü gui ciah kya ci. Khanpughi no mi hmakat nak gui kä tenge in ne a na k’chük’nga gui ah hlo ah mi mi gui phih k’chang gui ah a na kat nak gui m’gein gui ne mi m’hngi tu hnging  vai ah Boi no na m’thei gui ciah kya ci.