Bä ciah Yohan ( Pope) ah ghinlu a mong

Papa Shangpughang a k’htük nak Yohan cu Italy ghunkhaw, Tuscany maanggo ung ng’tüi ciah kya ci. A k’hmo k’chang ah kya ne Roma Boiphaya ng’htoi un glut tu ciah kya ci.Christu kum 523, Deacon ah a kya yah ge ung Papa Shangpughang ah a kya vai ah a mi ghü ah kya ci. A cun ung ka no kä sho phahleih Italy  ung ngoh ciah ghunkhaw mang Shangpughang Theodoric ah ambassadorial kya lo ne Constantinople empire ung om ciah Justine ah hteit ci.

Ghunkhaw mang Shanpughang no a ni ah a hngu läk k’chang gui a mi m’cha lang gui nak ung ka no a ghung gui vai ah phäh ah a m’ung k’kyawng ah htin ciah kya ci. Constantinople ung om ciah k’chang gui cu, Papa Shangpughang cu a kia ah yeikyai gängtham ne do ci gui ah kya ci. Papa Shangpughang no Italy ung om ciah Christian k’chang gui cu phu shui nak ung ka no kä mi ci ein hlot vai ah yum ghong ciah a mi om k’ih gui a kein lo vai ah Empire am pyein ciah kya ci. Cun tu pang ah phih a shä lam ung kä ng’hloi hleih Papa Shangpughang ah khan ah kä ng’ngaih gep ci gui ah kya ci.

Christu kum 526ung Papa Shangpughang lo ba hleih Revenna ung om ciah thong khui kyawng ah a mi chum ah kya ci. A mi yo k’ka nak ah phäh ah yai lo ne a cun ah thong khui k’kyawng ah shi ciah kya ci.