Bä ciah Isidore ah ghinlu a mong

Lai bi ne geit ko ei awk ci gui ah k’chang gui ghung m’htei ciah bä ciah Isidore cu Spain ghunkhaw, Madrid maanggo ung dudong ciah k’kyawng khui ung ka no ng’tui lo ciah kya ci. A hmo hta yah ge ung tün ne lai bi ne geit ko ne om man ciah ah kya ci. A ni cu a kya ah kyom ciah k’hngumi tu mat awn k’kyawng khui khoi ne a hta tu mat om ci te a hmo hta ge ah shih ciah kya ci. Cun tu pang ah phih ngani cu a ni shi hla ah ng’yak hlü hlu ah kä läk ein ne om khai goi ah ni na ät ci goi ah kya ci. Isidore cu a k’hngüp täi phayakyawng ah hteit ne k’taigü hnging ciah kya ci. Lai ah bi a bi yah ung phih k’taigü ne om ciah kya ci. A ng’shong yah ung phih Madrid Co phaya kyawng ah hteit ne Khanpughi awn ng’pong ne om ciah kya ci. Khaw k’hngüp ät ung a täng ah bi bi ci gui ah a teihpüi gui no k’taigü nak gui cu mät ah bi loh gui na awihkhaih ci ci ne ci ne bä ciah Isidore cu m’kat ne pyein ci gui ah kya ci. A cun ng’yak ciah laimah no ngami ah pyein a k’cang ah  a kya lah kä kya cu hmat hlü ne dümhta ah Isidore cu m’htih hleih, Isidore cun phih k’chang gui ah pyein ah hlo ah bi bi nak ung a hngupi bäih ah a gok tu ci hnguh ciah kya ci. Cun tu pang ah phih Khanhtapup gui a k’da no a pei ah om u ne a bi cu gung ne a mi bi tu pui cu hnguh ciah kya ci. A ni cu duyai k’chang gui gung htot ne nga mi gui ung hlü ci pe gui ciah kya ci. A mät ka vai kä ng’ngaihtüh ein ne k’chang am peitak ciah kya ci.