Daily Reflection – Paschal poi a k’phli nak, May k’cha a ghaleik’phli (14) hngüp ng’yak ah ng’thu k’ni
*************************************************************************************** ***************************************************************************************
Act 1: 15-17, 20-26
John 15: 9-17
Tuhngoi ng’yak ah ng’thu k’ni cu ng’ngahtüh ah a kya ung kho m’dek ah khan ah om ciah k’chang gui a van ghep cu k’chang gui ah m’hngi yei nak vai ng’ yak hlü ci gui ah kya ci. k’chang gui ah m’hngi yei nak gah ci gui cun phih yeikyai ne om ci gui ah kya ci. Cung phih k’chang gui ah m’hngi nak cu a k’sho ah kya hnging khai ah kya ci. Mät ah ng’ngaih äp nak gui maih lo ne ng’ngaih ah hlo ah a I kä kya lo ba ung k’chang gui ah m’hngi nak cun phih ng’pai lo gäk gäk ne a k’hngu ah maih lo hnging ciah kya ci. Cunnung phih Khanpuhgi ah m’hngi nak läi cu a ngoiä phih kä maih hnging khai ah kya ci.
Pa Khanpughi ah m’hngi yei nak a k’be gah ciah Hta Boi Yesu no mi mi gui cun phih a kya ah na m’hngi gui ci ci cu a mät no khäng htek hleih pyein ciah kya ci. Khanpughi ah m’hngi yei nak a k’be a phu kä pe ein ne mi gah ciah mi mi k’chang gui am Khanpughi no ng’yak ba hlü ne a na shan ba gui tumat om ciah kya ci. A cun cu I ang ci ah a kya ung “ Kei no nang mi ka ning m’hngi gui ah hlo ah nang mi phih tumat lah tumat a k’ni ah m’hngi ng’kyu ne om vä” ci ah kya ci. Boi Yesu no mi mi k’chang gui ah k’khan ah a na m’hngi nak gui cu a mät ah hngun a shih vai hngo kä ng’vang ne a na m’hngi gui ah kya ci. Khanpughi ah m’’hngi yei nak a k’be ah mi gah lo ung mi mi m’lung kyong lah a pung mi om k’ih nak gui phih mi yeikyai cu ng’hmat lo ciah kya ci.
Khanpughi no k’chang gui a van kä m’khom’cha ein ne yei nak ci, m’hngi ci ci ah kä ng’ngaih, lo ah a kya ung mät no mät m’hngi vai lah k’chang gui m’hngi yei nak vai cu kä kya hnging khai ah kya ci. Cung kon ah Boi yeisu no a na m’thei m’cäi ah hlo ah mi om ah a kya ung Boi Yeisu ah teihpüi ah phih mi kya lo hnging khai ah kya ci. Cun hlok ah ni ciah Khanpughi cu mi om k’ih mi pyein hlak mi biloh gui awm a m’lung kä m’tüi m’hlei ein ne Khanpughi phih kyai pokkchang gui phih kyai mi m’hngi yei nak awn khaw m’dek kyom khai ah mi pyang ko.
