Pope Benedict XVI lah a khòtüi pèingléng
Kei ah mà ah Kahtolic Htahtana uk ca Papa Shangpùghang Benedict 16 no a khngà kphlàng cuh hma ca lam ung ngyung ca kä càng ca hlùmmlèi lam gui khtät neh akhòtüi pèingléng ani nak hluitä mòòng khäntâi mòòng a péit hmatnak ah hlùmmlèi mòòng dämtài lam gui cun phih pyàngtham neh kbäi vai hlü ci. Papa Shangpùghang no a mdáng cuh khòmdek mòòng shui ktäih nak ung lam tumat bäng on teng neh kä pyéinpit khin ah kya ci. Akhòtüi khòmdek cuh kbô kpai shuì ktäih neh kä gah neh tumat bäng ah nghtòi ngkhóp neh a cun ung akhòtüi pèingléng ghin om nak,khngûmí,kpámí lam,kkyòngkhui lam kchàng hlu lam ci gui on amòòng lam van cùmbòi neh om ci.Acun ah kya hleih acun ah a ngtói gé ah akhòtüi pèingléng adínak cuh kchàng gui am a hngùn kghìng päng on dìmkyäp neh om vai lam pyàng ca thùng yó on phih a ng’et ah ngshün ngphan ci.(Benedict 16)
Papa Shangpùghang Benedict no kchàng gui ah kä mà na neh ami bi ah phäh ah akhòtüi pèinglèng cuh akdá adíshùm ah mòòng mi kbäi vai ah pyéin ci.Kchàng gui ah kchàng hlu mòòng gui cun phih díshùm ci. Acun ah adíshùm nak cuh kä ni ca nì lam tumat ah phäh ah kya ci.Cun cuh tuhchü kchàng gui cuh ami om ih gui lam mshüm ca ma neh kä gah hnging ah (Kkhaanpùghí no akbäi ah)bä càngnak a om ah mòòng kä dô hlü nak lah kchàng gui ah bü ngngaih ah om nak kä khin kkà hleih ami mtaam ah phäh ah kya ci. Mät ah ngngaih bäng kä mtúng en vai cuh khmih ci gui.Kchàng cuh amät no amät kä tüì khmüt ci.Kchàng ung hngùn mchà lah mlùng a om ah hlo ah kchàng ah a ngtüi mlùng cun phih om ci.
Papa Shangpùghang no pá tumat ah ng’ä nak on Kkhânpùghí no a tüi ah khòmdek on bùichúm ah kyihkyok nak gui mi mhteih vai na kthäh gui ci.Khòmdek ah mà lam cuh mi kut ung om neh avan cuh mi khohtang ah kya neh avan cuh mi mät ka vai bäng ah mi mang ci.Mikmi cuh kchàng ah tah bä tu bàbca Kkhânpùghí a om ah mòòng kä mi kbäi neh a hei i phih kä mi hnguh lo ba ung ka no lèng neh Kkhânpùghí no a tüi ah a hngùn kghìng gui a nglat ah mi htùngmang nak mi lèng ci.
