Bä ciah Anslem ah ghinlu a mong

Canterbury maanggo ah Taigü Maang ah kya caih bä caih Anslem cu Christu kum 1033 ung Italy ghunkhaw Aosta maanggo ung hlüngtai ciah k’kyawng khui ung ka no ng’tüi ciah ciah kya ci. A kho kum 27 ung Normandy maanggo, Bec ung om ciah St. Benedict Yahteih ng’htoi ung lut tu ne a cun ung kho kum k’thum k’taigü ne om ne ta Caen maanggo ung kyawng uk Yahteih ah kya lo ciah kya ci. Yahteih gui no a ni Yahteih a ng’vai ah a kya vai ah k’hmo yah ci ci ne pyein tu lang pang u hlei phih a ni ah k’chü m’gein nak lah a m’lung a ng’shäi nak awn Yahteih gui a k’ni ah lam m’shüm gui ne khawn mang gui hnging ciah kya ci. A ni cu k’hmo k’hto gui kho mong nak ung a k’ni ah kho mang gui hnging ciah kya ci.

Ca a m’thei nak ung kä aung tang ciah Yahteih tumat am a ni no a pyein cu “ Na k’cham ah k’kyawng ah shing ghing tumat geit ne ta a van chit ne na ci ah a kya ung a ng’ban gui kä lut lo hnging khai ah kya ci. Nang no a cun ah hlo ah na na k’hmo gui na ci ah kya ci. Yeikyai nak, hlagei nak kä om ein ne a k’cum ah kyük khai gui ah na ci gui ci” ci ne pyein ciah kya ci. A ni cu maappi k’bäih ne ng’ngahtüh nak ung hlüngtai ne ghuih ciah kya ci. Monologue ci ah ca uk ung a ni no Khanpughi cu Hlüngtai pi ciah Khanpughi ah kya ci ci lah Prologue ung Khanpughi a k’cang ah om ci ci cu a ming thang khai ah m’dang ciah kya ci. Christu kum 1093 ung Cantabury ung Taigü Maang ah kya lo ciah kya ci. A ni cu khophung ung ka no leng leng ba ne a mi k’täm ah kya ci. Christu kum 1109, April k’cha 21 ung shih ciah kya ci.