Paschal poi bi a mong
Caä Israel k’chang gui Egypt khaw ah phan k’cahng ah kya man ci gui. Phan k’chang ung ka no a mi phon vai ah Khanpughi am ng’shang ne kho kum a k’sho leng leng k’taigü ne om man ci gui ah kya ci. Cung tu panglang ah phih khaw k’hngüp ät ung lei tu mat om lo ne Egypt k’chang gui ah hta k’pa a ‘hmo hta gui a van shi yop ci gui ah kya ci. Israel k’chang gui ah a mi hta k’htük hta k’pa gui läi cu a mi ghun vai ah Mose ah pyein a hlo ah läk u ne a mi im hmai m’kot lo ung htome ah a shi awn hluk u ne hto me ah a hla ei u hlei leiget ung ka no phyong u ne a mi hta k’pa htük gui cun phih phyong ci gui ah kya ci.
A cun ah mü ung Pharod shangpughang ah hta k’pa shih lo hleih Israel k’chang gui phan k’chang ung ah no phyon hlot ci gui ah kya ci. A cun ah a mi phyon lo nak cu Passover ci ne a mi pyein ah kya ci. Passover ci cu Egypt khaw ung ka no k’phank’chang ah kya nak ung ka no phyong lo ci gui ah Judea k’chang gui no a mi bi ah poi ah kya ci. A cun gui a van shüm ba ne Christian k’chang gui no Boi Yesu Christu k’chang gui ah kat nak ah phäh ah a shi, a ghinlo ba cu mi mi gui ah kat nak ung ka no a na k’phyon gui cu shüm hmat nak ba vai ah shin ah poi cu bi ba hti ah kya ci. Vang ah pyein ah a kya ung Ester (Paschal) ci cu Boi Jesu shih nak ung ka no a ghin lo ba nak mi bi ba ah a kya ah hlo ah mi mi gui phih kat nak ung ka no mi phyong nak ah poi ah phih kya ci.
Ester ci cu Passover awn a ni ng’phan täng hleih phyon nak ci ah ng’phlan tu lang pang hlei phih Passover läi cu Egypt khaw ung phan k’chang ung ka no phyong lo ci gui ah Judea k’chang gui no a bi ah poi ah kya ci.
