Khem-hngüp däm
Holy Thursday ciah htitheing ca k’hngüp ung mi bi gui cuh a kya k’thuk neh Catholic yumtubum noh bi ba hti a kya ci. Tuhngoi cuh Bawi Jesu noh amät a shi-hla Sacrementu a pyan ghüt cuh mi bi ba ci, Bawiphaya a kya nak cun phih a täng a pyan ghüt ci ah kya ci. A hlu-läk gui a mi kho m’shi pe gui neh a i hlok cha ami om vai m’thei gui ciah kya ci. Mikmi cuh avan a tah bä tu ba vai, hlüng tai tu ba vai, khong mang k’chang a mi kya hlü ci. Cun a kya hleih, Bawi Jesu mät noh a hlu-läk gui ah kho m’shi gui neh ng’khot ng’ge vai among, m’lung m’nem vai among lah avan kavai bi bi vai gui cuh na m’thei gui ghüt ci.
Paschal kä om pha ung Jesu nawh sin-ah khaw m’dek ung-kah, a Pá-ah a ng’plonnák vai a chin lo cuh, hmat ci. M’Dek ’khãn-ah a nong ghüt-ah, a-hlu-läk gùi cuh, m’hni gùi neh a k’càng càng-ah m’hni gùi ci-ah kia ci.
Simon-ah htá, Judas Iscariot-ah m’lung ung Jesu a k’tun vai-ah, khaw-’nget nawh a tók tu gé. Jesu nawh phih, avan kanák vai-ah, a Pá Khãnpùghí nawh a péit lah, a mät cuh, Khãnpùghí ung-kah lo neh Khãnpùghí-ah a hteh lo bà vai cuh, hmat zop neh ei ami einák-ung-kah, ng’düí lo neh a ng’vaih hlúit ci. Hlam zun-bèi mah awn a ’chéi chit ci. Cun kon-ah, khap tumat ung tui lüng neh, a-hlu-läk gùi-ah khaw m’si péit gùi nehtah a ’chéi a chihnák-ah, hlam awn ghuit péit gùi ci. Simon Petru-ah gok lo hleih Petru nawh, “Nang Báwi, ka khaw na m’si khai nü mä,” ci ci. Jesu nawh, “Ka bi cuh, tuh-chü kä na hmat ci. A k’hngú-ah na hmat lo khai,”ci ci. Petru nawh, “Báwi nawh, kei-ah khaw-tah a i zah ung phih, kä m’si ng’nü khai néi,” ci neh dám hleih Jesu nawh, “Kä ka ning m’si ung nang cuh, kei awn kä ni vun-ät khai,” ci neh piéin ci. Petru nawh phih, “Báwi aw, cun-ah a kia ung ka khaw bäng-ah kä kia neh kakut ni, ka lu-’kè ni mah-ah néi bäí,” ci ci. Jesu nawh, tui ng’si pi ci-ah phäh-ah, a khaw bäng m’si vai hlü ci. Ani a púm-ah théing-èi ci. Htaih láng u ci hleih phih, a m’sah kä théing htaih tu ci. Ani u nawh k’tun lo-khai cuh, hmat neh, “Nangmí ung a m’sah kä théing ci,” a ci-ah kia ci. Ami khaw a m’si zop kon-ah, a hlui hlùi bà neh ngoh nehtah, “Ka ning bi péit gùi-ah màwng cuh, nami hmat ci ang? M’Thei tu k’tu lah, Báwi-ah kia tu ’càng-a hleih nami na chü ci. A cun-a phih ka kia mä ci. Nami na Báwi, nami na m’thei tu k’tu nawh, nami khaw ka ning m’si péit gùi-a hlo-ah, nangmí phih tumat lah tumat, khaw nami m’si tu kiu vai. Kei nawh nangmí ung ka ci nami hnguh-a hlo-ah, nami bi vai ka ning m’thei gùi ghüt-ah kia ci.
