April 13 Bä ciah Martin ah ghinlu a mong (Pope)
A hngupi ah cang lam ung a hngun pe ciah Papa Shangpughang ah kya ciah bä ciah Martin cu Italy ghunkhaw, Todi maanggo ung ng’tüi ciah kya ci. A ni ah ni ci lam gui a läk lah a htitheing nak ah phäh ah Roma Taigü Boi gui ah hngu ah a ng’ming thang ciah kya ci. Christu kum 649 ung Papa Shangpughang ah kya lo ne a cun ah kum ung ka no tün ne Lateran ung Boi Yesu Khanpughi ah kya nak lah k’chang ah kya nak kä yum ci ah vuata katkot khai ah yum nak ung khawng mang ciah ci chü gui ne k’bum gui ci. Papa Shangpughang no a cun ah ng’bum nak ung Boi Yesu Khanpughi ah kya nak lah k’chang ah kya nak a ni ni k’hngih om ci ci cu a m’hteng ah pyein ciah kya ci. A cun kä yum ci gui a van cun phih yumtu ng’bum ung ka no a pät gui ah kya ci.
A cun ah vuata läk ciah ah The Estern Emperor Constant Ⅱ no a cun ah Papa Shanpughang ah ci gui ng’yak ne a kya ah m’lung she ne Papa Shangpughang a mi pha vai ah pyein ci. Ga k’kap gui no bä ciah Martin cu Constantinoble ah khah pui ne ghunkhaw htitsaphuk ci ne khophung a mi got täm ah kya ci. Bä ciah Martin no a guk nak ung “ kei cu kho k’hngüp k’phikip lei k’chüh peng peng tui k’oh kä pyein ah tui k’ching düt awn phih kä ng’shi ci. Kei ah teihpüi gui lah ka ng’kho k’chang gui no phih kei na k’hmih cia gui. Cung phih Boi Yesu mät no kei na ghung m’htei khai. Boi no kei ah yaica nak gui a k’hngu ah chüt hleih ka na nong khai” ci ne guk ciah kya ci. A ni cu Christu kum 656 ung Cherson maanggo ung shih ci. A ning cu cang lam ung a hngun pe ciah a k’hngu pi bäih ah Papa Shangpughang tumat ah kya ci.
