Bä ciah Yohan Baptist de La Salle ah ghinlu a mong
De la Salle koyin ng’htoi m’düih ciah bä ciah Yohan Baptist de La Salle cu Christu kum 1651 ung Pyinhtit khaw Rhieims maanggo ung ng’tüi ciah kya ci. A mi m’lung k’nga hlüngtai ne Khanpughi a k’ni ah khänghtek hleih yum ciah a ni ah a nu lah a pa no a ni cu Taigü Boi ah kya nak ah kyawng ung tüi tu ni hleih, Christu kum 1678 ung a cun ah kyawng ung Taigü Boi ah kya lo tu caih kya ci. Taigü Boi ah a kya nak kä sho phahleih, a mät ah ghinlu cu duyai ci gui ah k’hmo hta gui am hnguh hmat nak a m’htei m’thang vai ah a m’lung phupit ne Rheims maanggo ung Khanpughi ah mong lam a bi loh gui nong güt ciah kya ci.
A shämko ah a khoh htang gui a van yoi tuk ne duyai ci gui ah a k’hmo hta gui ka vai kyawng im gui k’hmon pe gui ciah kya ci. Ca m’thei m’thang nak ung k’tha nak ne ca m’thei hnguh hmat ci gui ah ca m’thei ci gui ah kyawng Saya ghaleigoi 12 cu bä ciah Yohan Baptist yum u ne a hngu läk ci gui ah kya ci. A cun ah kya hleih nga mi gui a van cu ät ne ng’pong u ne ta a k’hmo hta gui ah hnguh hmat nak ca m’thei nak awn a mi ghinlu gän ap khai gui ah a mi m’lung phukpit ci gui ah kya ci. A cun gui cu a k’hngu ah De La Sa Koyin gui ci ne a mi chü gui ah kya ci. M’thei m’thang nak ung a k’ni ah a ng’däih ah a mi bi hnging vai ah phäh ah (Ordination) ci ah Boiphaya kä kya khai gui ah a mi m’lung phukpit ci gui ah kya ci.
Christu kum 1698 ung a k’hngih nak England Shanpughang James no a ng’hui pa nak ah phäh ah bä ci gui lah ng’bühng’mang ci gui ka vai maapi k’bäih ne ca ng’thei nak ah kyawng k’hmon pe gui ciah kya ci. Bä ciah Yohan Baptist cu Khanpughi ah chü nak ah lam ung a ghinlu pum yaica nak gui a daa buiawt ciah kya ci. Kho k’hngüp ä tung a k’pung ah ka kyawng Saya no Pari maanggo ung om ciah kyawng a khai vai ah pyein ci. Koyin ng’htoi ung om ciah kä khin ciah Koyin a m’shah no phih de La Salle cu a kya ling m’hteng ne Koyin gui k’kaa nak gui ci ci ne k’puk u ne a hei a vai uk khai a tha vai ah Taigü maang am ng’shang u hleih Taigü Maang no a cun ah a mi pyein cu kä k’bäi gui ne a mi mät Kokyin ng’htoi ung ka no a mi ng’pät vai ah pyein ci. Bä ciah Yohan Baptist de la Salle cu Christu kum 1719 ung Rouen manggo ung shih ciah kya ci. A ni cu kyawng Saya,Saya mah gui ghnung m’htei ciah bä ciah k’chang tu mat ah kya ci.
