Bä ciah Vincent Ferrer ah ghinlu a mong
Bä ciah Dominic Yahteih ng’htoi ung Khanpughi ah mong lam thähla nak ung a ng’ming thang ciah bä ciah Vincent Ferrer cu Christu kum 1350 ung Spain ghunkhaw, Valencia maanggo ung ng’tüi ciah kya ci. A nu pa noh a ni am duyai k’chang gui a m’hngi yei lo nak thei vai ah a hngüp k’thum hngüp lah a hngüp k’chuk hngüp ah kya ciah ( Wednesday and Saturday ) ung kyünhloi ne a k’taigü vai lah Boi Yesu lah Nu Maria u pa ng’ngaih u ne a om vai ah m’thei a ni m’thei m’thang ah kya ci. Christu kum 1374 ung St. Dominic Yahteih ng’htoi ung lut tu ne k’chang gui a k’daa no hmat ne a ng’ming thang ciah Khanpughi ah mong lam thähla ci tu mat ah kya lo ci.
A ni ah m’htei m’thang gui cun van ung yat ne aung htang lo ciah kya ci. A ni no a hteipüi Boiphaya gui am a pyein cu “Nang mi Khanpughi ah mong lam na mi thähla ung lang ne k’chang a van no a hmat thei vai ah k’chü m’kha awn ( a vai hlüng ka ) ci ah k’chü gui mang ne na mi thähla m’thei m’thang vai. Ng’ngai tu ci gui ah k’chang gui pang no a ni bäng am na mi m’thei m’thang ci ah a mi ng’ngaih vai ah na mi thähla m’thei m’thang vai” ci ne m’cäi gui ciah kya ci. A ni cu Uyopa ung htei ghüi ne kat nak, shih nak ah mong, m’htei khaw k’däm ah mong, Khanmopi ghinkhaw a mong gui a mong cu a k’tung pi ah m’thei m’thang gui ciah kya ci. A ni ah m’thei m’thang ng’ yak ci gui ah k’chang gui a daa cu a mi kat nak ung ka no ng’yu ba ne a mi kat nak ng’khan ci gui ah a ng’thong hlah lo ah chüt hleih a m’thei m’thang ni ciah bä ciah k’chang tumat ah kya ci.
A ni awn a täng ah hteit hton ci gui ahTaigü Boi gui cu bä ciah Vincent ah bi loh gui cu gunhtot tu ci gui ah kya ci. A ni awn a täng ah hteit hton ne gunghtot ci gui ah Taigü gui am a pyein cu, kat phleh ciah gui ah yum tu k’chang gui na mi ng’ngaih peit yah ung a k’tha ken ci gui am hngip hngäi ci ah k’tha pe gui ne, ghatghum ci gui am Khanpughi m’hngi nak awn a mi kyih vai na mi m’dang vai ci ne pyein nak gui ci. Bä ciah Vincent Ferrer cu Christu kum 1419 ung Pyinhtit khaw ah shi ciah kya ci.
